Azərbaycan Dillər Universitetinin (ADU) Beynəlxalq münasibətlər kafedrasının müəllimi Pəri Əliyevanın təşkilatçılığı ilə tələbələr üçün maarifləndirici ekskursiya keçirilib. Ekskursiyada Beynəlxalq münasibətlər ixtisası üzrə təhsil alan 294R qrupunun tələbələri iştirak ediblər.
“Tehsil365” xəbər verir ki, ekskursiya iştirakçıları paytaxtın ən önəmli nöqtələrindən biri olan İstiqlaliyyət küçəsi boyunca yürüş edərək, ilk olaraq Azərbaycan Milli Elmlər Akademiyasının (AMEA) Məhəmməd Füzuli adına Əlyazmalar İnstitutunun binası ilə tanış olublar. Azərbaycan Milli Elmlər Akademiyası-nın bu institutunun tarixi əhəmiyyəti barədə məlumat verilib. Müəllim Pəri Əliyeva tələbələrə bu binanın tarixi əhəmiyyəti haqqında məlumat verərək, 1918-1920-ci illərdə Azərbaycan Xalq Cümhuriyyəti Parlamentinin məhz burada yerləşdiyini və milli dövlətçilik tariximizin mühüm qərarlarının bu divarlar arasında qəbul edildiyini xüsusi vurğulayıb.
Daha sonra Azərbaycan Xalq Cümhuriyyətinin İstiqlal abidəsini ziyarət edən tələbələr müstəqilliyin elan edilməsi prosesi barədə müəllimlə interaktiv dialoq aparıblar.
Proqram çərçivəsində İsmailiyyə sarayının memarlıq üslubu və taleyi haqqında da ətraflı məlumat verilib. Bildirilib ki, bina 1918-ci ilin mart soyqırımı hadisələri zamanı yandırılsa da, sonradan bərpa edilmiş və bir müddət Müsavat Partiyasının qərargahı kimi fəaliyyət göstərmişdir.
Gəzinti “İçərişəhər” Dövlət Tarix-Memarlıq Qoruğunda davam etdirilib. Burada tələbələrə Qoşa Qala qapıları və Kiçik Qala küçəsinin şəhərsalma xüsusiyyətləri izah olunub. Ekskursiya Azərbaycanın orta əsr dövlətçilik rəmzi olan Şirvanşahlar sarayının ziyarət edilməsi ilə yekunlaşıb.
Qeyd edək ki, ekskursiya Azərbaycan Respublikasının Prezidenti cənab İlham Əliyevin müvafiq Sərəncamı ilə 2026-cı ilin ölkəmizdə “Şəhərsalma və Memarlıq İli” elan edilməsi ilə əlaqədar olaraq təşkil olunub.