Azərbaycan Dillər Universitetinin (ADU) Təhsil fakültəsinin Psixologiya və Pedaqogika kafedrasında Denov Sahibkarlıq və Pedaqogika İnstitutunun professor-müəllim heyəti tərəfindən “Məktəbəqədər təhsil” və “İbtidai sinif müəllimliyi” ixtisasları üzrə master-klass dərsləri keçirilib.
“Tehsil365” xəbər verir ki, Master-klasslardan əvvəl Təhsil fakültəsinin dekanı Firuzə Rzayeva, Psixologiya və pedaqogika kafedrasının müdiri İranə Məmmədli və kafedranın müəllimi Səbinə Rüstəmovanin iştirakı ilə görüş keçirilib. Görüş zamanı tərəflər arasında elmi-pedaqoji əməkdaşlıq imkanları, qarşılıqlı təcrübə mübadiləsi və gələcək birgə fəaliyyət perspektivləri müzakirə olunub.
Daha sonra müvafiq ixtisaslar üzrə təşkil olunan master-klass dərsləri çərçivəsində müasir pedaqoji yanaşmalar, innovativ təlim metodları, interaktiv dərs modelləri və tələbəyönümlü tədris strategiyaları üzrə praktiki təcrübələr iştirakçılarla bölüşülüb. Eyni zamanda, beynəlxalq təcrübənin tədris prosesinə inteqrasiyası məsələlərinə də toxunulub.
Keçirilən master-klass dərslərinin iki ali təhsil müəssisəsi arasında elmi-pedaqoji əməkdaşlığın inkişafına töhfə verdiyi, qarşılıqlı akademik əlaqələrin möhkəmləndirilməsi baxımından əhəmiyyətli olduğu vurğulanıb.
