Aprelin 17-də Azərbaycan Dillər Universitetinin (ADU) İngilis və alman dilləri fakültəsi nəzdində İngilis dilinin leksikologiyası kafedrasının təşkilatçılığı ilə “Prezident İlham Əliyevin dil siyasətində dilin saflığının qorunması prinsipləri” mövzusunda dəyirmi masa keçirilib.
“Tehsil365” xəbər verir ki, dəyirmi masada İngilis və alman dilləri fakültəsinin dekanı, fil.f.d., dosent Naibə Camalzadə, İngilis və fransız dilləri fakültəsinin dekanı, fil.f.d., dosent Vəfa Babayeva, İngilis dilinin leksikologiyası kafedrasının müdiri, fil.f.d., dosent Mehriban Hüseynova və kafedranın əməkdaşları iştirak ediblər.
Tədbirin açılışında çıxış edən İngilis dilinin leksikologiyası kafedrasının müdiri Mehriban Hüseynova Prezident İlham Əliyev tərəfindən həyata keçirilən dil siyasətində dilin saflığının qorunmasının əsas prinsiplərindən bəhs edib. O, Azərbaycan dilinin milli kimliyin əsas elementlərindən biri kimi təqdim olunduğunu, xüsusilə qloballaşma dövründə dilə daxil olan yad sözlərin nəzarətsiz artımının qarşısının alınmasının vacibliyini qeyd edib.
İngilis dilinin leksikologiyası kafedrasının müəllimi Məmmədli Məhbubə çıxışında bildirib ki, Prezident İlham Əliyev üçün Azərbaycan dili yalnız ünsiyyət vasitəsi deyil, xalqımızın milli kimliyini, zəngin mədəniyyətini və dövlət müstəqilliyini təmsil edən ən böyük mənəvi sərvətdir. O vurğulayıb ki, dövlət başçısının dil siyasətində dilin saflığı məsələsi prioritet istiqamətlərdən biridir və bu yanaşma dilin qloballaşma dövrünün təsirlərindən qorunmasını, eyni zamanda onun daxili inkişaf imkanlarının maksimum dərəcədə hərəkətə gətirilməsini nəzərdə tutur.
Qeyd olunub ki, Azərbaycan dilinin saflığının qorunması dövlət səviyyəsində bir çox tədbirlərdə xüsusi vurğulanır və eyni zamanda hüquqi çərçivədə tənzimlənir. Bu prinsiplərin real həyatda tətbiqi məqsədilə cənab Prezident tərəfindən fundamental hüquqi baza yaradılıb. Xüsusilə 2018-ci ildə imzalanmış “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” sərəncam bu sahədə yeni mərhələnin əsasını qoyub.
Daha sonra İngilis dilinin leksikologiyası kafedrasının müəllimi Ağayeva Günay çıxış edərək bildirib ki, dilin saflığı dilin öz söz ehtiyatının qorunması, lazımsız və həddindən artıq xarici sözlərin qarşısının alınması deməkdir. O qeyd edib ki, bu, dilin digər dillərdən söz qəbul etməməsi anlamına gəlmir, əksinə, dillər tarix boyu qarşılıqlı təsir nəticəsində inkişaf edib. Lakin əsas məsələ bu təsirin zəruri və məqsədəuyğun şəkildə həyata keçirilməsidir.
Ağayeva Günay həmçinin vurğulayıb ki, müasir dövrdə, xüsusilə gənclər arasında xarici sözlərdən həddindən artıq istifadə halları geniş yayılıb və bunun əsas səbəbləri kimi sosial şəbəkələrin təsiri və xarici sözlərin daha prestijli hesab olunmasını göstərib.
İngilis və fransız dilləri fakültəsinin dekanı Vəfa Babayeva çıxışında dilin saflığının qorunmasında təhsil sisteminin rolunun böyük olduğunu qeyd edib. O bildirib ki, məktəblərdə və ali təhsil müəssisələrində şagird və tələbələrə ana dilinə sevgi aşılanmalı, düzgün və səlis danışıq vərdişləri formalaşdırılmalıdır. Bununla yanaşı, media və sosial platformaların da bu sahədə məsuliyyət daşıdığı vurğulanıb.
İngilis və alman dilləri fakültəsinin dekanı Naibə Camalzadə isə çıxışında terminologiya məsələsinə diqqət çəkərək bildirib ki, yeni anlayışlar yarandıqca onların Azərbaycan dilində uyğun qarşılıqları hazırlanmalı və istifadəyə daxil edilməlidir. Bu yanaşma dilin inkişafını təmin etməklə yanaşı, onun saflığının qorunmasına da xidmət edir.
Dəyirmi masada həmçinin İngilis dilinin leksikologiyası kafedrasının əməkdaşları – dosent Lalə Əsədova, dosent Nigar Bəşirova, fil.f.d., baş müəllim Ülviyyə Əhmədova, fil.f.d., baş müəllim Günay Tahirzadə və baş müəllim Mülayim Bağırova çıxış edərək mövzu ətrafında fikirlərini bölüşüblər.
Tədbir müzakirələrlə davam edib, iştirakçılar tərəfindən mövzu ilə bağlı fikir mübadiləsi aparılıb və dilin saflığının qorunmasının əhəmiyyəti bir daha vurğulanıb.
