“Şəhərsalma və Memarlıq İli” çərçivəsində ölkənin müxtəlif elm və mədəniyyət müəssisələrində təşkil edilən tədbirlərdə şəhərsalma ənənələri, müasir yanaşmalar və tarixi irsin qorunması məsələləri geniş müzakirə olunur. Bu istiqamətdə növbəti tədbir Cəfər Cabbarlı adına Respublika Gənclər Kitabxanasında Bakı Dövlət Universitetinin “İnformasiya və sənəd menecmenti” fakültəsinin tələbələrinin təşəbbüsü ilə baş tutub.
Bu barədə “Tehsil365” ə kitabxanadan məlumat verilib.
Tədbirdə kitabxananın direktoru Aslan Cəfərov “Şəhərsalma və Memarlıq İli”nin ölkəmizdə milli-mədəni irsin qorunması istiqamətində mühüm mərhələ olduğunu vurğulayıb. Təşkil edilən bu tədbirlərin gənclərin milli-mədəni dəyərlərə bağlılığının gücləndirilməsi, onların şəhərsalma və memarlıq sahəsində biliklərinin artırılması baxımından xüsusi əhəmiyyət kəsb etdiyini bildirərək, eyni zamanda, bu təşəbbüslərin Azərbaycanın zəngin tarixi irsinin qorunması və gələcək nəsillərə ötürülməsi istiqamətində mühüm addım kimi qiymətləndirildiyini bildirib.
Tədbirin əsas mövzuları Azərbaycan şəhərlərinin keçmişi, bu günü və gələcək inkişaf perspektivlərini əhatə edib.
Bakı Dövlət Universitetinin tələbələrinin tədbir çərçivəsində təqdim etdikləri mövzuların gənclərin həm tarixi irsə bağlılığını, həm də innovativ düşüncəsini əks etdirib.
“Sənəd və informasiya menecmenti” fakültəsinin “Kitabxanaşünaslıq” kafedrasının müəllimi Aygün Əliyeva tələbələrin bu cür tədbirlərdə fəal iştirakını yüksək qiymətləndirərək qeyd edib ki, müasir dövrdə tarixi irsin düzgün sənədləşdirilməsi, qorunması və gələcək nəsillərə çatdırılması mühüm vəzifələrdən biridir.
Tədbir çərçivəsində Azərbaycanın müxtəlif bölgələrində yerləşən tarixi abidələri əks etdirən videomateriallar nümayiş olundu. Bu materiallarda abidələrin keçmişi, tarixi əhəmiyyəti və bu gün aparılan bərpa işləri geniş şəkildə təqdim edilib.