Müasir dövrdə uşaqların ətrafı müxtəlif oyuncaqlarla doludur. Valideynlər çox zaman düşünür ki, nə qədər çox oyuncaq olsa, uşaq bir o qədər inkişaf edər. Lakin mütəxəssislər bu yanaşmanın hər zaman doğru olmadığını bildirirlər.
Mövzu ilə bağlı məktəbəqədər təhsil üzrə ekspert “Tehsil365"ə açıqlama verib.
Ekspert bildirib ki, “Oyuncaqların çoxluğu avtomatik olaraq daha yaxşı inkişaf demək deyil. Əksinə, həddindən artıq seçim uşağın diqqətini parçalaya və fokuslanmasını çətinləşdirə bilər.”
Onun sözlərinə görə, az və funksional oyuncaqlar daha effektiv olur: “Sadə və çoxfunksiyalı oyuncaqlar uşağın təsəvvür gücünü daha çox işə salır. Uşaq həmin oyuncağı müxtəlif ssenarilərdə istifadə etməyə başlayır ki, bu da yaradıcılığı inkişaf etdirir.”
Ekspert qeyd edib ki, çox oyuncaq bəzən passivliyə səbəb olur: “Uşaq hazır funksiyalı, səsli və işıqlı oyuncaqlarla oynadıqda, o daha az düşünür və daha çox izləyici rolunda qalır.”
O həmçinin vurğulayıb ki, oyuncaqdan daha vacib olan oyunun özüdür: “Əsas məsələ oyuncaq sayı deyil, uşağın necə oynadığıdır. Valideynlə birlikdə oynanan sadə oyunlar belə daha dərin inkişaf təmin edə bilər.”
Ekspert valideynlərə seçim zamanı diqqətli olmağı tövsiyə edib: “Keyfiyyətli, yaşa uyğun və yaradıcılığı stimullaşdıran oyuncaqlara üstünlük verilməlidir.”
Sonda ekspert bildirib ki, “Uşağın inkişafı üçün ən yaxşı mühit çoxlu oyuncaq deyil, düşünməyə, kəşf etməyə və yaratmağa imkan verən balanslı oyun mühitidir.”