“İmtahan stressi şagirdlər arasında geniş yayılıb və bu vəziyyət emosional, koqnitiv və davranış səviyyəsində müxtəlif təsirlər yaradır. Əsas məsələ stressi aradan qaldırmaq deyil, onu düzgün idarə etməkdir.”
Bu sözləri "Tehsil365"ə açıqlamasında psixoloq Mətanət Əliyeva deyib.
O bildirib ki, imtahan dövründə şagirdlərdə narahatlıq, qorxu, özünəinamsızlıq və uğursuzluqdan çəkinmə kimi hallar müşahidə olunur. Onun sözlərinə görə, yüksək stress motivasiyanın azalmasına və davamlı gərginlik hissinə səbəb ola bilər.
Psixoloq qeyd edib ki, bu vəziyyət yalnız emosional deyil, eyni zamanda koqnitiv funksiyalara da təsir edir. Belə ki, diqqət dağınıqlığı, yaddaş zəifləməsi və imtahan zamanı “bloklanma” halları tez-tez rast gəlinir.
Mətanət Əliyeva əlavə edib ki, davranış baxımından da şagirdlərdə təxirəsalma, imtahandan qaçma və ya əksinə, həddindən artıq yüklənmə müşahidə olunur. Bundan başqa, yuxu pozuntuları, iştah dəyişiklikləri və fiziki narahatlıqlar da yarana bilər.
O vurğulayıb ki, stressin müəyyən səviyyəsi faydalıdır və motivasiyanı artırır. Lakin uzunmüddətli və yüksək səviyyəli stress artıq mənfi təsir göstərərək həm psixoloji vəziyyəti, həm də akademik nəticələri zəiflədir.
Sonda o qeyd edib ki, valideyn və müəllimlərin dəstəyi, düzgün planlama və istirahət balansı şagirdlərin stressi daha sağlam şəkildə idarə etməsinə kömək edir.