“Bu gün təhsildə ən vacib istiqamətlərdən biri süni intellektin inteqrasiyası və distant təhsilin inkişafıdır. Xüsusilə ali təhsildə bəzi ixtisaslar üzrə mütəxəssis çatışmazlığı olduqda, xarici ölkələrdən mütəxəssislərin onlayn şəkildə dərs prosesinə qoşulması real vaxtda keyfiyyətli təhsil imkanları yaradır.”
Təhsil eksperti Elçin Süleymanov təhsildə baş verən innovativ dəyişikliklər və müasir texnologiyaların rolu barədə “Tehsil365”ə açıqlama verib. Ekspert bildirir ki, müasir texnologiyalar təhsil prosesini daha çevik və əlçatan edir. Onun sözlərinə görə, hazırda təhsil sistemində əsas yenilik istiqamətləri süni intellektin tətbiqi və uzaqdan təhsilin inkişafı ilə bağlıdır.
Elçin Süleymanov qeyd edir ki, süni intellekt və digər innovativ texnologiyalar müəllimləri əvəz etmir, əksinə onların işini daha effektiv edir:
“Düzdür, süni intellekt müəllimi əvəz edə bilməz və bu, nə mümkün, nə də doğru bir yanaşmadır. Lakin bu texnologiyalar müəllimlərə daha yaradıcı, daha interaktiv və şagirdlərin düşüncə tərzinə uyğun materiallar hazırlamağa imkan verir.”
Onun sözlərinə görə, hazırkı Z nəsli və gələcək alfa nəsli texnologiya ilə daha sıx bağlıdır və bu da tədris metodlarının dəyişməsini zəruri edir:
“Yeni nəsil daha sürətli, daha praktik və rəqəmsal mühitə daha uyğun şəkildə formalaşıb. Ona görə də ənənəvi tədris metodları artıq tam effektiv deyil. Daha çevik, innovativ və interaktiv metodlara ehtiyac var.”
Ekspert əlavə edir ki, tədris prosesində əyləncəli və vizual üsulların artırılması vacibdir:
“Təhsil daha çox əylənərək öyrənmə prinsipinə əsaslanmalıdır. İnfoqrafikalar, interaktiv tapşırıqlar və müxtəlif rəqəmsal alətlər vasitəsilə şagirdlərin diqqətini cəlb etmək və öyrənmə prosesini daha effektiv etmək mümkündür.”