“Din tədrisi deyəndə nə nəzərdə tutulur? Bu tədrisi kimlər həyata keçirəcək? Bu kimi məsələlər aydınlaşdırılmadan mövzunu ümumi şəkildə ‘din tədrisi’ kimi təqdim etmək bir qədər absurd görünür.”
İlahiyyatçı Elşad Miri “Tehsil365”ə açıqlamasında din tədrisi ilə bağlı müzakirələrə münasibət bildirərək bu məsələnin dəqiq şəkildə aydınlaşdırılmasının vacibliyini vurğulayıb.Onun sözlərinə görə, “din tədrisi” anlayışı özü bir neçə mühüm sualı gündəmə gətirir və bu suallar cavabsız qaldıqda mövzu düzgün təqdim oluna bilmir.
Elşad Miri qeyd edir ki, tarixdə mövcud olmuş mədrəsə təhsili ilə müasir dövrdə təklif olunan yanaşmalar eyni deyil:
“Keçmişdəki mədrəsə təhsili yalnız dini biliklərlə məhdudlaşmırdı. Müasir dövrdə isə bu məsələ daha fərqli yanaşma tələb edir və burada müxtəlif çətinliklər ortaya çıxır.”
İlahiyyatçının fikrincə, məktəblərdə geniş mənada din tədrisinin tətbiqi real və doğru yanaşma deyil:
“Mən hesab edirəm ki, hazırkı şəraitdə bu formatda din tədrisinin həyata keçirilməsi mümkün və düzgün deyil. Bunun əvəzinə daha çox dinlər tarixi çərçivəsində ümumi məlumatların verilməsi daha uyğun ola bilər.”
O əlavə edib ki, belə bir tədris yalnız müxtəlif dinlər haqqında ümumi biliklərin təqdim olunması ilə məhdudlaşa bilər.