Qəbələ Dövlət Peşə Təhsil Mərkəzinin 2026–2030-cu illəri əhatə edən Strateji İnkişaf Planının (SİP) “Seft Consulting” MMC tərəfindən hazırlanmış layihəsinin müzakirəsinə həsr olunmuş işçi qrupu görüşü keçirilib. Görüşdə Mərkəzin rəhbərliyi, inzibati heyəti və əməkdaşlar iştirak ediblər.
“Tehsil365“ xəbər verir ki, tədbirin əsas məqsədi Strateji İnkişaf Planı layihəsinin kollektiv yanaşma əsasında təkmilləşdirilməsi, sənədin daha praktik, müasir və nəticəyönümlü formada hazırlanmasına dair təkliflərin dinlənilməsi olub.
Müzakirələr zamanı sənədin müxtəlif bölmələri üzrə bir sıra vacib təkliflər səsləndirilib. Xüsusilə Mərkəzin fəaliyyətini əks etdirən vizual materialların yenilənməsi, məzun göstəriciləri, tərəfdaş layihələr, təşkilati struktur, büdcədənkənar gəlirlər, sosial ödənişlər və inzibati heyətlə bağlı statistik məlumatların plana əlavə olunması məqsədəuyğun hesab edilib.
Eyni zamanda sənəddə daha aydın və müasir terminologiyadan istifadə olunması, hər bölmə üzrə nəticə hissələrinin əlavə edilməsi, sorğu nəticələrinin sistemli təqdimatı, akkreditasiya prosesi ilə bağlı məlumatların inteqrasiyası və inkişaf ehtiyaclarına dair konkret fəaliyyət istiqamətlərinin göstərilməsi tövsiyə olunub.
Görüş zamanı vurğulanıb ki, hazırlanacaq Strateji İnkişaf Planı Qəbələ Dövlət Peşə Təhsil Mərkəzinin növbəti illərdə institusional inkişafı, tədris keyfiyyətinin yüksəldilməsi, əmək bazarına uyğun kadr hazırlığı və idarəetmənin təkmilləşdirilməsi baxımından mühüm yol xəritəsi olacaq.
Qəbələ Dövlət Peşə Təhsil Mərkəzində Strateji İnkişaf Planı müzakirə edilib
6822.04.2026 - 16:15
