Onun sözlərinə görə, tələbələrə sərbəst formada seçim imkanı tanınmalıdır “ Müəllim seçimindən tutmuş fənn seçiminə qədər bu qərarları özləri qəbul etməlidirlər.”
Təhsil eksperti Elçin Əfəndi “Tehsil365”ə açıqlamasında bildirib ki, tələbələrin özünüidarəetmə və təşəbbüskarlıq imkanlarının artırılması onların həm elmi göstəricilərinə, həm də gələcək karyera imkanlarına müsbət təsir göstərə bilər.
Əfəndi qeyd edib ki, ənənəvi metodda vahid dərslər və vaxtlar təyin olunur, tələbələr isə həmin qaydalara uyğun iştirak etməlidirlər. Bu isə müəyyən çətinliklər yaradır. “Biz Bolonya sisteminə keçid almışıq və həmin sistemin təqdim etdiyi imkanlar tələbələrə tanınmalıdır. Onlar daha vacib fənləri seçərək özlərinə lazım olan bilikləri əldə etməlidirlər. Qeyri-ixtisas fənləri tələbələr üçün əhəmiyyət daşımır və bu halda bakalavr pilləsini 4 ilə yox, 3 ilə, bəzi ixtisaslarda isə hətta 2 ilə bitirmək mümkündür.”
Ekspert əlavə edib ki, dərs müddətləri də daha çevik olmalıdır. “90 dəqiqə auditoriyada oturmaq əvəzinə 60-70 dəqiqə kifayət edə bilər. Mühazirələrə universitetə getmədən online qoşulmaq, yalnız seminarlarda iştirak etmək mümkündür. Bu yanaşma tələbələrin təcrübə keçmə imkanlarını da yaxşılaşdırar. İki il nəzəri biliklərdən sonra ən azı bir il praktiki təcrübə qazanmaq onların gələcək əmək fəaliyyətinə başlamaq üçün mühüm rol oynaya bilər.”
Elçin Əfəndi vurğulayıb ki, tələbələrin sərbəst seçim imkanına malik olması onların motivasiyasını artıracaq, tədris prosesinə marağı gücləndirəcək və daha məhsuldar nəticələr əldə etmələrinə şərait yaradacaq. Onun fikrincə, bu yanaşma həm də tələbələrin özünü daha rahat ifadə etməsinə, müstəqil qərar verməsinə və peşəkar inkişafına geniş imkanlar açacaq. “Əgər tələbələr öz maraqlarına uyğun fənləri seçə bilsələr, bu, onların gələcəkdə daha ixtisaslı mütəxəssis kimi formalaşmasına və əmək bazarında daha tez uyğunlaşmasına kömək edəcək.”
Ekspertin fikrincə, Bolonya sisteminin mahiyyəti də məhz tələbəyə sərbəst seçim imkanı verməkdir. Bu imkanlar tam şəkildə tətbiq olunduqda, təhsil keyfiyyəti yüksələcək, tələbələrin vaxt itkisi azalacaq və onların əmək bazarına daha hazırlıqlı qoşulması təmin olunacaq.