Onun sözlərinə görə ,”Ümumi respublika səviyyəsində qəbul edilən bütün qərarlar Nazirlər Kabineti və müvafiq qurumlar – Elm və Təhsil Nazirliyi, Dövlət İmtahan Mərkəzi və digər aidiyyəti dövlət strukturları tərəfindən verilir və bütün təhsil ictimaiyyəti tərəfindən icra olunur.”
Təhsil eksperti Ramin Nuruəliyev “Tehsil365”ə açıqlamasında bildirib ki, təhsil sahəsində tələbələrin birbaşa qərarvermə prosesində iştirak etməsi nəzərdə tutulmur.
Ekspert qeyd edib ki, tələbələrin qərarvermə prosesinə qoşulması yalnız müəyyən məhdud çərçivədə mümkündür. “Məsələn, universitet rəhbərliyi daxili məsələlərlə bağlı tələbələrin fikirlərini öyrənə, onların mülahizələrini nəzərə ala bilər. Bu halda tələbələrə təklif təqdim olunur, onlar fikirlərini bildirirlər və rəhbərlik həmin fikirlərə uyğun müəyyən addımlar ata bilər. Amma ümumi respublika səviyyəsində qəbul edilən qərarlarda tələbələrin səsvermə hüququ yoxdur.”
Nuruəliyev əlavə edib ki, məktəb və universitet daxilində verilən qərarlar da yalnız rəhbərlik tərəfindən qəbul olunur. “Tələbələrin və ya təhsil alanların fikirlərini almaq üçün müəyyən təkliflər irəli sürülə bilər, lakin yekun qərar rəhbərlik tərəfindən verilir. Respublika səviyyəsində isə yalnız Nazirlər Kabineti, Elm və Təhsil Nazirliyi, Dövlət İmtahan Mərkəzi və digər müvafiq qurumlar qərar qəbul edə bilər.”
Ekspertin fikrincə, tələbələrin fikirlərinin nəzərə alınması tədris mühitinin daha sağlam formalaşmasına kömək etsə də, strateji və ümumi təhsil siyasəti ilə bağlı qərarlar yalnız dövlət qurumlarının səlahiyyətindədir.