Onun sözlərinə görə, ilk növbədə tənzimləyici təsirin qiymətləndirilməsi mexanizmi tətbiq edilir. “Bu yanaşma vasitəsilə qanunun iqtisadi, sosial və hüquqi nəticələri əvvəlcədən təhlil olunur, mümkün risklər və gözlənilən faydalar balanslaşdırılır. Eyni zamanda müvafiq dövlət qurumlarının rəyləri nəzərə alınır, sahələr üzrə mütəxəssislər və qeyri-hökumət təşkilatları prosesə cəlb olunur.”
Milli Məclisin deputatı, Ana Vətən Partiyasının sədri Günay Ağamalı “Tehsil365”ə açıqlamasında bildirib ki, qanun layihələri hazırlanarkən bir neçə mühüm analitik mexanizmdən istifadə olunur.
Deputat vurğulayıb ki, statistik məlumatların təhlili də qərarların daha əsaslı qəbul edilməsinə xidmət edir. “Xüsusilə sosial yönümlü qanunvericilik təşəbbüslərində əhalinin müxtəlif qruplarına göstərə biləcəyi təsirlərin əvvəlcədən qiymətləndirilməsi mühüm əhəmiyyət kəsb edir.”
Ağamalı qeyd edib ki, cəmiyyətin iştirakı qanunvericilik prosesinin ayrılmaz hissəsinə çevrilib. “Qanun layihələri rəsmi platformalarda yerləşdirilir, ictimai müzakirələr təşkil olunur, media və sosial şəbəkələr vasitəsilə geniş auditoriyaya təqdim olunur. Parlament müzakirələri və qəbul olunan qərarlar ictimaiyyətə çatdırılır. Əsas məqsəd qanunları qəbul etmək və onların cəmiyyət üçün fayda verməsini təmin etməkdir.”
Deputatın sözlərinə görə, bu istiqamətdə atılan addımlar müsbət nəticələr verməkdədir və qanunvericilik prosesində həm analitik yanaşmalar, həm də ictimai iştirakın gücləndirilməsi gələcəkdə daha səmərəli nəticələrə gətirib çıxaracaq.