Azərbaycan Dillər Universitetinin İngilis və fransız dilləri fakültəsinin İngilis dilinin tədrisi metodikası kafedrasının dosenti, filologiya üzrə fəlsəfə doktoru Əminə Səfərzadə 318 B qrupunda tələbələrlə birlikdə “İqlim dəyişikliyinə qarşı mübarizə” mövzusunda dəyirmi masa keçirib.
“Tehsil365” xəbər verir ki, tədbir zamanı tələbələr mövzuya dair təqdimatlarla çıxış edib, öz fikir və mülahizələrini bölüşüblər. Qeyd olunub ki, müasir dövrdə iqlim dəyişikliyi bəşəriyyətin üzləşdiyi ən ciddi qlobal problemlərdən biridir. Temperaturun artması, buzlaqların əriməsi, ekstremal hava hadisələrinin çoxalması və biomüxtəlifliyin azalması bu prosesin açıq göstəriciləri kimi xarakterizə edilir. Bu dəyişikliklər yalnız ekoloji deyil, eyni zamanda iqtisadi və sosial sahələrə də ciddi təsir göstərir. Buna görə də iqlim dəyişikliyinə qarşı mübarizə hər bir fərdin və cəmiyyətin prioritet istiqamətlərindən birinə çevrilməlidir.
Diqqətə çatdırılıb ki, iqlim dəyişikliyinin əsas səbəblərindən biri insan fəaliyyətidir. Xüsusilə fosil yanacaqların yandırılması nəticəsində atmosferə buraxılan istixana qazları qlobal istiləşməni sürətləndirir. Sənayeləşmə, meşələrin qırılması və qeyri-davamlı istehlak vərdişləri bu prosesi daha da dərinləşdirir. Bu baxımdan, problemin həlli üçün həm texnoloji yeniliklərə, həm də davranış dəyişikliyinə ehtiyac vardır.
Bildirilib ki, iqlim dəyişikliyinə qarşı mübarizədə təhsil mühüm rol oynayır. Ali təhsil müəssisələri yalnız bilik ötürən deyil, həm də şüur formalaşdıran mərkəzlərdir. Tələbələrin bu mövzuda məlumatlandırılması, onların tənqidi düşünmə bacarıqlarının inkişaf etdirilməsi və ekoloji məsuliyyət hissinin aşılanması gələcəkdə daha davamlı cəmiyyətin qurulmasına zəmin yaradır. Dəyirmi masa, debat və təqdimatlar kimi interaktiv tədris metodları tələbələrin mövzuya marağını artırır və onların aktiv iştirakını təmin edir.
Sonda vurğulanıb ki, iqlim dəyişikliyinə qarşı mübarizə yalnız dövlət siyasəti ilə deyil, eyni zamanda maarifləndirmə və təhsil vasitəsilə də effektiv şəkildə aparılmalıdır. Hər bir fərd bu prosesdə öz məsuliyyətini dərk etməli və davamlı həyat tərzini təşviq etməlidir. Təhsil isə bu dəyişimin əsas hərəkətverici qüvvəsi olaraq qalır.
