Çində 14 yaşlı məktəbli ev şəraitində reaktiv mühərrik yığıb.
“Tehsil365” "Oddity Central" nəşrinə istinadən xəbər verir ki, Çe Tszinqan hələ uşaq bağçası yaşlarından kağız təyyarələrlə eksperimentlər apararaq aviasiyaya maraq göstərib.
Valideynlərinin sözlərinə görə, o, hər gün aerodinamika və əlaqəli fənlər üzrə ədəbiyyat oxumağa saatlarla vaxt sərf edib. Artıq ibtidai siniflərdə oxuyarkən məktəbli riyazi analiz və layihələndirmə kimi mürəkkəb mövzuları mənimsəməyə, həmçinin xüsusi mühəndislik proqramları ilə işləməyə başlayıb. Daha sonra o, biliklərini praktikada tətbiq etmək qərarına gəlib və öz reaktiv mühərrikini yaratmağı qarşısına məqsəd qoyub.
Yeniyetmə hazır çertyojlardan istifadə etməkdən imtina edərək, layihələndirməyə sıfırdan başlayıb: o, lazımi detalları hazırlayıb, 2D və 3D modellər yaradıb, həmçinin hava axınlarının temperatur və təzyiq parametrlərini hesablayıb. İşin gedişatını sosial şəbəkələrdə paylaşan məktəbli həvəskarlar icmasından böyük dəstək alıb.
Altı ay sonra Çe mühərrikin ilk prototipini yığsa da, konstruksiya və yanacaq sistemindəki problemlər səbəbindən sınaqlar uğursuz olub.
Buna baxmayaraq, yeniyetmə ruhdan düşməyib və hazırda qurğunun təkmilləşdirilmiş versiyasını hazırlayır. Onun sözlərinə görə, uğursuzluq təlimin vacib mərhələsi və irəli getmək üçün əsas motivasiya mənbəyidir.