23 Aprel - Çin Kosmonavtika Günü münasibətilə Azərbaycan Dillər Universitetinin Konfutsi İnstitutunda “Çinin kosmik proqramı: tarix və nailiyyətlər” adlı tələbə elmi seminarı keçirilib.
Bu barədə “Tehsil365” ə Konfutsi İnstitutundan məlumat verilib.
Tədbiri açan Konfutsi İnstitutunun direktoru Rafiq Abbasov qeyd edib ki, Çin kosmik proqramı çərçivəsində Yer kürəsinin müşahidələri, Ay və dərin kosmos tədqiqatları, peyk sistemləri inkişaf etdirilir və pilotlu missiyalar həyata keçirilir. Kosmos sahəsində Azərbaycan-Çin əməkdaşlığı və kosmik fəzanın dinc məqsədlərlə istifadəsi barədə danışan R.Abbasov Azərbaycan Respublikasının Prezidenti İlham Əliyevin də iştirak etdiyi 74-cü Beynəlxalq Astronavtika Konqresini xatırladıb.
Daha sonra Azərbaycan Dillər Universitetinin çinşünaslıq ixtisası üzrə tələbələri Çinin kosmik proqramının məqsəd və vəzifələrini, o cümlədən “BeiDou” müstəqil naviqasiya sisteminin inkişafı, orbital stansiyaların yaradılması, Ay, Mars və asteroidlərin tədqiqi, kosmik proqramların hazırlanması və kosmosda kibertəhlükəsizliyin qorunmasını müzakirə ediblər. Həmçinin Çinin kosmik proqramının tarixinə nəzər salınıb. İlk peykin buraxılışından tutmuş müntəzəm pilotlu uçuşların təşkilinə, “Tiangong” orbital laboratoriya layihələrinin həyata keçirilməsinə, Çin orbital stansiyasının mərkəzinə çevrilən “Tianghe” əsas modulunun, “Tiangong” ay zondu “Çanqenin” və “Tianwen”in Marsa uçuşuna qədər məsələlər müzakirə olunub. Qeyd edilib ki, Çin dünyada üçüncü kosmik supergücdür və milli çoxmodullu orbital stansiyaya malik yeganə ölkədir.
Qeyd edək ki, 1970-ci il aprelin 24-də Çinin ilk süni Yer peyki olan “Dongfanghong-1” kosmosa buraxılıb.