“Təşviş pozuntusu insanın gündəlik həyatını əhəmiyyətli dərəcədə təsir edən, davamlı narahatlıq, qorxu və gərginlik hissləri ilə xarakterizə olunur.”
Psixoloq Mələk Kərimova təşviş pozuntusu (anksiyete) ilə bağlı “Tehsil365”ə açıqlama verərək bu psixoloji vəziyyətin insan həyatına təsirlərindən danışıb.Psixoloq qeyd edir ki, bu vəziyyət özünü bir neçə əsas əlamətlə göstərir. Bunlardan biri həddindən artıq narahatlıqdır.
Mələk Kərimova əlavə edir ki, təşviş pozuntusu olan insanlar tez-tez davamlı gərginlik hissi yaşayır:
“Şəxs özünü daim narahat və təhlükə altında hiss edir. Bu isə bədənin sanki ‘hazır vəziyyətdə’ qalmasına səbəb olur.”
Onun sözlərinə görə, təşviş yalnız emosional deyil, həm də fiziki simptomlarla müşahidə olunur. Bu simptomlara ürək döyüntüsünün sürətlənməsi, tərləmə, əllərdə titrəmə, nəfəs darlığı və mədə-bağırsaq narahatlıqları daxildir.
Psixoloq diqqətə çatdırır ki, təşviş pozuntusu konsentrasiya və yuxu problemlərinə də səbəb olur:
“Bu vəziyyətdə olan şəxslər diqqətlərini toplamaqda çətinlik çəkir, yuxuya getməkdə problemlər yaşayır və tez-tez oyanırlar.”
Eyni zamanda, qaçınma davranışları da bu pozuntunun əsas xüsusiyyətlərindən biridir:
“Şəxslər narahatlıq yaradan vəziyyətlərdən uzaq durmağa çalışır. Bu isə zamanla sosial və peşəkar həyatın məhdudlaşmasına gətirib çıxarır.”
Mələk Kərimova bəzi hallarda insanların nəzarəti itirmə qorxusu yaşadıqlarını da vurğulayıb:
“Onlar özlərini idarə edə bilməyəcəkləri və ya pis bir hadisə baş verəcəyi ilə bağlı güclü qorxu hiss edə bilərlər.”
Sonda psixoloq qeyd edib ki, təşviş pozuntusu müalicə oluna bilən bir vəziyyətdir:
“Erkən diaqnoz və düzgün psixoloji dəstək, xüsusilə koqnitiv-davranış terapiyası vasitəsilə insanların həyat keyfiyyətini əhəmiyyətli dərəcədə yaxşılaşdırmaq mümkündür.”