Azərbaycan Dillər Universitetinin Alman dilinin fonetikası və qrammatikası kafedrasının müdiri, dosent Qahirə Axundova 1–15 aprel tarixlərində Türkiyənin Hacettepe Universitetində “Orhun” proqramı çərçivəsində akademik mübadilə proqramında iştirak edib. Səfərin əsas məqsədi ali təhsil müəssisələri arasında akademik əlaqələrin genişləndirilməsi, tədris və tədqiqat sahəsində təcrübə mübadiləsinin həyata keçirilməsi olub.
“Tehsil365” xəbər verir ki, səfər çərçivəsində Hacettepe Universitetinin Alman dili bölməsində fəaliyyət göstərən fakültə və kafedra rəhbərləri, eləcə də Beynəlxalq Əlaqələr Ofisi ilə bir sıra işgüzar görüşlər keçirilmişdir. Görüşlər zamanı tərəflər arasında mövcud əməkdaşlıq imkanları, birgə elmi-tədqiqat layihələri və akademik mübadilə proqramlarının inkişaf perspektivləri ətrafında geniş fikir mübadiləsi aparılıb həmçinin tələbə və müəllim mübadiləsinin genişləndirilməsi, birgə seminar və elmi konfransların təşkili kimi istiqamətlər müzakirə olunub.
Proqram müddətində Qahirə Axundova Alman dilinin müxtəlif istiqamətlərini əhatə edən dərslərdə iştirak edib, tədris prosesini yaxından müşahidə edib və yerli müəllim heyəti ilə birgə dərs prosesinə fəal şəkildə cəlb olunub. Eyni zamanda o, Alman dilinin nəzəri və praktiki aspektlərini əhatə edən təlimlər, dərslər və təqdimatlar təşkil edərək tələbələrlə bilik və təcrübəsini bölüşüb.
Daha sonra oxşar akademik format çərçivəsində Ege Universitetində də Alman dili sahəsində fəaliyyət göstərən akademik heyətlə işgüzar görüşlər keçirilib, mövcud və potensial əməkdaşlıq imkanları müzakirə olunub. Bununla yanaşı, tələbələr üçün praktiki yönümlü təlimlər və akademik sessiyalar təşkil edilərək tədris prosesinə töhfə verilib.
Hər iki universitetdə həyata keçirilən fəaliyyətlər Azərbaycan və Türkiyə ali təhsil müəssisələri arasında akademik əlaqələrin gücləndirilməsinə, beynəlxalq təcrübə mübadiləsinin inkişafına və yeni birgə elmi-tədris təşəbbüslərinin formalaşdırılmasına mühüm töhfə verib.
