21 aprel tarixində Azərbaycan Dillər Universitetində “Yaşıl dünya həftəsi” çərçivəsində Qərb ölkələri üzrə Regionşünaslıq kafedrası və Magistratura şöbəsinin birgə təşkilatçılığı ilə “Cənubi Amerika ölkələri, Mərkəzi-Şərqi Avropa ölkələri və Azərbaycanın torpaq ehtiyatları və torpaq problemlərinin müqayisəli təhlili” mövzusunda açıq dərs-dəyirmi masa keçirilib.
“Tehsil365” xəbər verir ki, açıq dərsdə BMR fakültəsi dekanı professor İbrahim Kazımbəyli, dekan müavinləri dosent Abbasov Asif və dosent Kərimov Namiq, Qərb ölkələri üzrə Regionşünaslıq kafedrasının müdiri, professor Sevdagül Əliyeva, kafedranın müəllimi Xanseyidova Lalə, müəllimi İmanzadə Əminə, magistrant Aysel Xəlili, həmçinin Cənubi Amerikaşünaslıq ixtisası üzrə 382, Mərkəzi və Şərqi Avropa ixtisası üzrə 383-cü qrupun tələbələri iştirak ediblər.
Tədbir çərçivəsində tələbələrin mövzu üzrə təqdimatları dinlənilib. Belə ki, Həsənzadə Samir “Cənubi Amerikanın torpaq ehtiyatları”, Ağayeva Nuranə “Mərkəzi və Şərqi Avropa ölkələrində torpaqların ekoloji problemləri”, Süleymanov Vəli “Azərbaycanın torpaq ehtiyatları” mövzularında çıxış ediblər.
Müzakirələr zamanı XXI əsrdə torpaqların şoranlaşması və eroziyaya məruz qalması, torpaq ehtiyatlarının azalmasına təsir edən əsas amillər, Cənubi Amerika və MŞA ölkələrinin torpaq ehtiyatları, Azərbaycanda torpağın ekoloji problemləri və onun həlli yolları geniş şəkildə təhlil olunub.
Açıq dərs iştirakçılar tərəfindən maraqla qarşılanıb və mövzu ətrafında fikir mübadiləsi aparılıb. Tədbir torpaq ehtiyatlarının qorunması və səmərəli idarə olunmasının vacibliyini bir daha önə çəkərək, tələbələrin bu sahədə bilik və maarifləndirilməsinə töhfə verib.
