Azərbaycan Dövlət İqtisad Universitetinin (UNEC) Beynəlxalq əlaqələr departamentinin Xarici əlaqələr şöbəsinin müdiri, Gəncə Dövlət Universitetinin doktorantı Rəsul Yusibov Macarıstanda beynəlxalq elmi konfransda iştirak edib.
Rəsul Yusibov “Tehsil365” ə bildirib ki, o, Obuda Universiteti tərəfindən hər il təşkil olunan beynəlxalq konfransın final sessiyasında “Münaqişədən sonrakı Qarabağda yaşıl artım transformasiyası və sahibkarlıq ekosisteminin inkişafı: Hərəkətverici qüvvələr, mexanizmlər və siyasət təsirləri” mövzusunda təqdimatla çıxış edib.
Onun sözlərinə görə, təqdimatda Qarabağ regionunun postmünaqişə dövründə yaşıl iqtisadi artım modelinə keçid imkanları, innovasiyayönümlü sahibkarlıq ekosisteminin formalaşdırılması, eləcə də dayanıqlı inkişafın təmin olunmasında institusional və iqtisadi mexanizmlərin rolu geniş şəkildə təhlil olunub. Tədqiqatın əsas elmi əhəmiyyəti Qarabağın yenidən qurulması prosesinə yalnız iqtisadi bərpa deyil, eyni zamanda, ekoloji dayanıqlılıq və innovativ inkişaf prizmasından yanaşılması ilə bağlıdır.
Rəsul Yusibov vurğulayıb ki, bu yanaşma regionun uzunmüddətli dayanıqlığı üçün inteqrasiya olunmuş inkişaf modelinin formalaşdırılmasına töhfə verir.
O əlavə edib ki, konfransda 20-dən çox xarici universitetin nümayəndələri, professor və tədqiqatçılar iştirak ediblər, müxtəlif ölkələrdən olan alimlər arasında geniş elmi müzakirələr aparılıb. Təqdimat iştirakçılar tərəfindən maraqla qarşılanıb.
Sonda çıxışın elmi aktuallığı və praktik əhəmiyyəti xüsusi vurğulanıb.