Əliyevanın sözlərinə görə, sağalma prosesi travmanı qəbul etməklə başlayır. “Yaşanan hadisələri basdırmaq müvəqqəti rahatlıq yaratsa da, ifadə olunmayan travma zamanla təşviş, qorxu, aqressiya və psixosomatik əlamətlər şəklində üzə çıxır. Travmanı qəbul etmək zəiflik deyil, əksinə insanın öz daxili vəziyyəti ilə üzləşməyə hazır olduğunun göstəricisidir.”
Psixoloq Mətanət Əliyeva “Tehsil365“ə açıqlamasında vurğulayıb ki, insanların travmalardan qurtulması çox zaman yanlış olaraq “tam unutmaq” kimi başa düşülür.” Halbuki psixoloji baxımdan əsas məqsəd travmanın yaddaşdan silinməsi deyil, onun insanın həyatına və qərarlarına təsir gücünü itirməsidir.”
O bildirib ki, travmadan çıxış yolunda təhlükəsiz mühitdə danışmaq mühüm rol oynayır. İnsan dinlənildiyini, başa düşüldüyünü və mühakimə olunmadığını hiss etdikdə sinir sistemi tədricən tarazlaşır. “Travma səssizlikdə deyil, etibarlı münasibətdə sağalır. Bu mərhələdə peşəkar psixoloji dəstək xüsusilə önəmlidir, çünki travma ilə işləmək spesifik bilik və təcrübə tələb edir.”
Psixoloq əlavə edib ki, bəzi hallarda insan travma ilə təkbaşına mübarizə apara bilsə də, elə vəziyyətlər var ki, terapiya artıq seçim deyil, zərurətə çevrilir. Davamlı kabuslar, güclü təşviş, səbəbsiz qorxular, emosional partlayışlar və sosial münasibətlərdən uzaqlaşma bu ehtiyacın açıq göstəriciləridir.
Əliyeva sonda qeyd edib: “Travmadan sağalmaq onu unutmaq demək deyil. Bu, insanın həyat keyfiyyətini, münasibətlərini və qərarlarını artıq travmanın idarə etməməsi deməkdir. Doğru zamanda başlanılan terapiya insanın özünü daha yaxşı tanımasına, travma ilə sağlam münasibət qurmasına və həyatına yenidən nəzarəti bərpa etməsinə imkan yaradır.”