Aprelin 24-də Azərbaycan Dövlət Pedaqoji Universitetində (ADPU) Elmi şuranın növbəti iclası keçirilib.
ADPU-dan “Tehsil365"ə bildirilib ki, iclası açan rektor Cəfər Cəfərov universitetdə aparılan islahatların ardıcıl xarakter daşıdığını bildirərək elmi fəaliyyətin keyfiyyətinin yüksəldilməsinin, beynəlxalq elmi bazalarda təmsilçiliyin genişləndirilməsinin və nəticəyönümlü idarəetmə mexanizmlərinin tətbiqinin prioritet istiqamətlərdən olduğunu vurğulayıb.
Elm və innovasiyalar üzrə prorektor professor Asəf Zamanov “ADPU-nun 2025-ci il üzrə elmi və elmi-təşkilati fəaliyyəti haqqında” hesabatla çıxış edib. A.Zamanov çıxışında qeyd edib ki, hesabat ili ərzində universitetdə elmi fəaliyyət normativ-hüquqi baza əsasında sistemli şəkildə təşkil olunub və bu sahədə keyfiyyət göstəricilərinin yüksəldilməsi istiqamətində məqsədyönlü addımlar atılıb. 2025-ci ildə 824 nəfərlik professor-müəllim heyətindən 760 nəfərinin (92,2 faiz) elmi-tədqiqat fəaliyyətinə cəlb olunması universitetdə elmi mühitin genişlənməsinin və akademik fəallığın artmasının göstəricisidir. Prorektor vurğulayıb ki, tədqiqatlar 59 istiqamət, 158 problem və 583 mövzu üzrə aparılıb və bu çoxşaxəli yanaşma universitetdə elmin müxtəlif sahələrinin paralel inkişafını təmin edir. Eyni zamanda, 173 elmi-tədqiqat işinin tədris prosesinə tətbiq edilməsi elmi nəticələrin praktik əhəmiyyətinin artdığını və təhsil–tədqiqat–innovasiya modelinin real nəticələr verdiyini göstərir.
Asəf Zamanov hesabatında elmi məhsuldarlıq göstəricilərinə xüsusi diqqət yetirərək bildirib ki, 2025-ci ildə universitet əməkdaşları tərəfindən 1764 elmi məqalə dərc olunub ki, onların 86-nın impakt faktorlu jurnallarda yer alması keyfiyyət baxımından mühüm nailiyyət hesab edilməlidir. Bununla yanaşı, 879 tezisin - o cümlədən 500-nün xaricdə dərc olunması, 9 monoqrafiya, 11 dərslik, 55 dərs vəsaiti, 47 kitab və 84 proqram və metodik vəsaitin nəşri universitetin elmi potensialının yüksək səviyyədə olduğunu təsdiqləyir. Həmçinin qeyd edilib ki, elmi fəaliyyətin keyfiyyət göstəricilərində də müsbət dinamika müşahidə olunur. “Scopus” bazasında h-indeksli alimlərin sayının 105-ə, “Google Scholar” üzrə 163-ə çatması, ümumi h-indeks göstəricilərinin isə müvafiq olaraq 205 və 372-dən çox olması universitet alimlərinin beynəlxalq elmi mühitdə nüfuzunun artdığını göstərir.
Beynəlxalq elmi əməkdaşlıq məsələlərinə də toxunan prorektor bildirib ki, hesabat dövründə 500 əməkdaşın beynəlxalq, 379 əməkdaşın isə respublika səviyyəli konfranslarda iştirakı təmin olunub. Eyni zamanda, elmi kadr hazırlığı sahəsində əldə olunan nəticələrə diqqət çəkilərək bildirilib ki, 2025-ci ildə 2 nəfər elmlər doktoru, 14 nəfər fəlsəfə doktoru elmi dərəcəsi, 3 nəfər professor, 10 nəfər isə dosent elmi adına layiq görülüb.
Sonra Keyfiyyətin təminatı şöbəsinin müdiri dosent Qalib Şərifov “Professor-müəllim heyətinin 2025-ci il üzrə fəaliyyətinin reytinq qiymətləndirilməsi” barədə geniş təqdimatla çıxış edib. Bildirilib ki, 2025-ci il üzrə reytinq qiymətləndirməsində 1287 nəfər müəllim iştirak edib ki, bu da əvvəlki illərlə müqayisədə yüksək dinamikanın qorunması deməkdir. Onların 832-si Bakı üzrə, 256-sı filiallar, 197-si isə kollec üzrə fəaliyyət göstərən əməkdaşlardır. İştirakçılar arasında 52 elmlər doktoru, 404 fəlsəfə doktoru, 39 professor və 245 dosentin olması akademik heyətin geniş spektrini əhatə etdiyini göstərir. Təqdimatda reytinq göstəricilərinin illər üzrə dinamikası da təhlil olunub. Qeyd edilib ki, son illərdə iştirakçı sayında və orta bal göstəricilərində davamlı artım müşahidə olunur. Qiymətləndirmədə 2018-ci ildə 761 nəfər, 2019-cu ildə 744 nəfər iştirak etdiyi halda, 2025-ci ildə bu rəqəm 1287 nəfərə çatıb. Bu artım universitetdə reytinq qiymətləndirməsinə marağın yüksəldiyini və sistemin institusional səviyyədə möhkəmləndiyini göstərir.
Strateji inkişaf məsələləri üzrə prorektor Könül Pirverdiyeva isə ADPU-nun Strateji İnkişaf Mərkəzinin Əsasnaməsinə düzəlişlərin edilməsi, “ADPU 2030” Strateji İnkişaf Planının monitorinqi və qiymətləndirilməsi üzrə metodiki çərçivə sənədinin və 2026-2027-ci tədris ili üzrə açar performans göstəriciləri sənədinin təsdiqi barədə təqdimatla çıxış edib. Prorektor qeyd edib ki, bu sənədlər universitetin idarəetmə sistemində şəffaflığın artırılması, nəticələrin ölçülməsi və strateji hədəflərə nail olunması baxımından mühüm əhəmiyyət kəsb edir.
Daha sonra cari məsələlər müzakirə edilib.