Aprelin 24-də AMEA-nın Azad Həmkarlar İttifaqının (AHİ) və Gənclər Akademiyasının təşkilatçılığı ilə Ümummilli Lider Heydər Əliyevin anadan olmasının 103-cü ildönümünə həsr edilən akademiyanın gənc alim və mütəxəssislərinin ənənəvi futbol çempionatının açılışı olub.
Bu barədə “Tehsil365"ə AMEA-dan məlumat verilib. Çempionatın açılış mərasimində AMEA-nın prezidenti akademik İsa Həbibbəyli bildirib ki, bu il də akademiyada Ulu Öndərin anadan olmasının 103-cü ildönümünə həsr edilmiş tədbirlərə futbol turnirinin açılışı ilə başlanılır.
O bildirib ki, AMEA-da futbol çempionatının keçirilməsi gənclərin fiziki sağlamlığının qorunması və onların asudə vaxtlarının səmərəli təşkili baxımından olduqca vacibdir. Çempionata göstərilən marağın bu il artdığını və AMEA-nın Gənclər Akademiyasının da özünün müstəqil komandası ilə yarışda təmsil olunduğunu deyən İ.Həbibbəyli son illərdə akademiya gəncliyinin inkişafı üçün bir sıra zəruri addımların atıldığını bildirib. O, hazırda Gənclər Akademiyasının beynəlxalq əlaqələrinin genişlənməsi və ölkəmizdə elmin populyarlaşdırılması istiqamətində əməli addımlar atdığını söyləyib. Bundan əlavə, akademiyada prioritet məsələlərdən biri olan kadr hazırlığı məsələsindən irəli gələrək gənc alim və mütəxəssislərin Misir, Polşa, Fransa və s. kimi ölkələrə təcrübə keçməyə göndərildiklərini vurğulayıb.
AMEA-nın Azad Həmkarlar İttifaqının fəaliyyətinə də toxunan akademik İsa Həbibbəyli təşkilatın akademiya həyatında yaxından iştirak etdiyini, müharibə iştirakçılarına, qazilərimizə, şəhid ailələrimizə daim diqqət və qayğı ilə yanaşdıqlarını bildirib. Həmçinin təşkilatın akademiya əməkdaşlarının sosial rifahının yüksəldilməsi, istirahətlərinin təmin olunması, mədəni tədbirlərdə iştirakı ilə bağlı tədbirlər həyata keçirdiklərini diqqətə çatdırıb.
Akademik İsa Həbibbəyli futbol çempionatının daim bayram əhvali-ruhiyyəsində keçirildiyini söyləyib və komandalara uğurlar arzulayıb.
AMEA-nın Azad Həmkarlar İttifaqının sədri siyasi elmlər üzrə fəlsəfə doktoru Sənan Həsənov bildirib ki, hər il olduğu kimi, bu il də komandaların çempionata hazırlığına diqqət yetirilib, onların bütün zəruri ehtiyacları qarşılanıb. O, həmçinin kənar təşkilatlarla akademiyanın yığma komandasının oyunlarının təşkilinin də nəzərdə tutulduğunu söyləyib.
Açılış mərasimində, o cümlədən AMEA-nın Arxeologiya və Antropologiya İnstitutunun Həmkarlar Təşkilatının sədri Faiq Babayev futbol çempionatına həsr etdiyi şeirini səsləndirib.
Sonda akademik İsa Həbibbəyli turnirin açılışının rəmzi olaraq topa ilk toxunuşu edib