Rusiyalı kardioloq Valeriya Bonadıkova qəhvənin ürəyə təsiri ilə bağlı danışıb.
“Tehsil365” bu barədə "lenta.ru"ya istinadla xəbər verir.
Onun sözlərinə görə, qəhvənin orqanizmə təsiri qəbul olunan miqdardan, tündlüyündən və içilmə vaxtından asılıdır.
Həkim bildirib ki, həddindən artıq qəhvə içmək nəbzin sürətlənməsinə, ürək döyüntüsündə fasilə hissinə və yuxu problemlərinə səbəb ola bilər. Xüsusilə qəhvəni müntəzəm deyil, böyük porsiyalarla qəbul edən insanlarda bu xoşagəlməz təsirlər daha çox müşahidə olunur.
Kardioloq qeyd edib ki, ürək problemlərinin qarşısını almaqda qəhvə içmək və ya içməmək əsas məsələ deyil. İnfarkt və insult riskini azaltmaq üçün ilk növbədə qan təzyiqinə, şəkər və xolesterin səviyyəsinə nəzarət etmək, siqaretdən uzaq durmaq, mütəmadi idmanla məşğul olmaq, artıq çəkidən qaçmaq və kifayət qədər yatmaq vacibdir.
Bonadıkovanın sözlərinə görə, ürək problemlərini tətikləyən əsas amillərdən biri yuxusuzluqdur. Əgər qəhvə yuxuya getməyi gecikdirirsə və gecə istirahətinin keyfiyyətini azaldırsa, bu, təzyiqin yüksəlməsinə və ümumi vəziyyətin pisləşməsinə səbəb ola bilər. Həkim vurğulayıb ki, yorğunluğu kofeinlə kompensasiya etmək, sonra yenidən yuxu pozuntusu yaşamaq və səhər daha çox qəhvəyə ehtiyac duymaq bir növ təhlükəli dövr yaradır.