Azərbaycan elmi və ədəbi fikrinin tanınmış nümayəndələrindən biri olan Mirəli Mirələkbər oğlu Seyidovin xatirəsi ehtiramla yad edilir.
“Tehsil365” xəbər verir ki, O, mifologiya, türkologiya və ədəbiyyatşünaslıq sahələrindəki fundamental tədqiqatları ilə seçilən alimlərdən biri olub.
1918-ci il mayın 5-də İrəvanda anadan olan Mirəli Seyidov uzun illər elmi-pedaqoji fəaliyyətlə məşğul olub, Azərbaycan elminin inkişafına mühüm töhfələr verib. Onun araşdırmaları xüsusilə türk mifologiyası və milli düşüncə sisteminin öyrənilməsi baxımından böyük əhəmiyyət kəsb edir.
1968-ci ildə filologiya elmləri doktoru elmi dərəcəsini alan alim, 1979-cu ildə professor adına layiq görülüb. 1976-cı ildən Azərbaycan Yazıçılar İttifaqının üzvü olan Mirəli Seyidov 1982-ci ildə “Əməkdar elm xadimi” fəxri adına layiq görülüb, həmçinin Azərbaycan Milli Yaradıcılıq Akademiyasının müxbir üzvü seçilib.
Görkəmli alim 1992-ci il aprelin 26-da Bakıda vəfat edib. Onun zəngin elmi irsi bu gün də tədqiqatçılar üçün dəyərli mənbə olaraq qalır.