İsmayıllı şəhər Eldar Məmmədov adına 3 nömrəli məktəb-liseyin müəllim və şagird kollektivi Qəbələ Dövlət Tarix-Bədii Qoruğuna səfər edib, qədim Albaniyanın tarixi mərkəzi ilə tanış olub, burada aşkar edilən eksponatlar haqqında ətraflı məlumat toplayıblar.
“Tehsil365” AZƏRTAC-a istinadən xəbər verir ki, qoruğu ziyarət edən şagird və müəllimlər ilk öncə qoruq ərazisində yerləşən Qəbələ Arxeoloji Mərkəzinə baxış keçiriblər. Mərkəzin sərgi salonlarında ziyarətçilər üçün nümayiş olunan tarixi eksponatlarla tanış olan məktəblilərə respublikada yeganə olan bu mərkəzin təşkil edilməsi, fəaliyyəti, həmçinin SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının gördüyü işlər barədə geniş məlumat verilib. Məktəblilərə Qəbələ Arxeoloji Mərkəzinin sərgi salonlarında ziyarətçilər üçün nümayiş olunan tarixi eksponatlarla yanaşı, Qəbələnin tarixi, etnoqrafiyası və folkloru haqqındakı kitablar toplusu barədə də məlumat verilib. Eyni zamanda, onlara qoruq ərazisində aparılmış arxeoloji qazıntıların nəticələri olan “Qəbələ arxeoloji ekspedisiyası: Hesabatlar və tapıntılar” və Qəbələ rayon şəhidlərinə həsr olunmuş “Qəbələ şəhidləri” kitab guşələri ilə də tanışlıq imkanı yaradılıb.
Daha sonra Qəbələ Dövlət Tarix-Bədii Qoruğunun Səlbir və Qala ərazilərinə səfər edən ziyarətçilər həmin yerlərdə aparılmış arxeoloji qazıntı sahələrinə baxış keçirib, aşkar edilmiş maddi mədəniyyət nümunələri ilə yaxından tanış olublar.
