“Tehsil365” İnformasiya Agentliyinin layihəsi olan “Şəhidin səsi” proqramının növbəti buraxılışı Vətən uğrunda canından keçmiş qəhrəman döyüşçü Namiq Şamil oğlu Abdullayevin həyat və döyüş yoluna həsr olunacaq. Veriliş 27 aprel saat 18:00-da agentliyin İcraçı Direktoru Amidə Zeynalovanın təqdimatında yayımlanacaq.
"Tehsil365" xəbər verir ki, Namiq Abdullayev 27 aprel 1962-ci ildə Bakı şəhərinin M. Rəsulzadə qəsəbəsində anadan olub. Orta təhsilini 99 saylı məktəbdə alan N. Abdullayev 1979–1981-ci illərdə Almaniya Demokratik Respublikasında hərbi xidmətdə olub. Xidmət zamanı aldığı xəsarət nəticəsində üçüncü dərəcəli əlillik statusu alıb. O, sonradan Balıqçılıq Konsernində çalışıb.
Ermənistan-Azərbaycan münaqişəsinin kəskinləşdiyi dövrdə Namiq Abdullayev hadisələrə biganə qalmayaraq könüllü şəkildə cəbhəyə yollanıb. 1991-ci ilin sonlarından etibarən 811 saylı hərbi hissənin tərkibində Laçın və ətraf ərazilərdə gedən döyüş əməliyyatlarında fəal iştirak edib.
O, xüsusilə Laçının cənub kəndləri uğrunda gedən döyüşlərdə igidlik göstərib. Daha sonra Laçın alayının Kəlbəcər istiqamətindən irəliləyərək rayonun şimal hissəsində apardığı əməliyyatlarda da ön sıralarda yer alıb, bir sıra yaşayış məntəqələrinin düşməndən azad olunmasında mühüm rol oynayıb.
1992-ci ilin oktyabr ayında Laçın şəhəri uğrunda gedən şiddətli döyüşlər zamanı mərmi partlayışı nəticəsində ağır yaralanan Namiq Abdullayev göstərilən tibbi yardımlara baxmayaraq, 19 oktyabr 1992-ci ildə şəhidlik zirvəsinə ucalıb.
Ailəli olan şəhidin iki övladı yadigar qalıb.
“Şəhidin səsi” proqramının bu buraxılışında Namiq Abdullayevin həyat yolu, döyüş xatirələri və qəhrəmanlıq nümunələri tamaşaçılara təqdim olunacaq.
