Aprelin 22-də Azərbaycan Dillər Universitetinin (ADU) Beynəlxalq Münasibətlər və Regionşünaslıq fakültəsinin Qərb ölkələri üzrə Regionşünaslıq kafedrası tərəfindən “Yaşıl dünya həftəsi” çərçivəsində tələbə konfransı təşkil olunub. Qərb ölkələri üzrə Regionşünaslıq kafedrası, Magistratura şöbəsi və Tələbə Elmi Cəmiyyətinin (TEC) birgə təşkilatçılığı ilə keçirilən tədbir dəyirmi masa formatında baş tutub. Konfransda moderator qismində magistrantlar çıxış edib, bakalavr pilləsində təhsil alan tələbələr isə fəal iştirak ediblər.
“Tehsil365” xəbər verir ki, tədbirin əsas məqsədi tələbələr arasında dayanıqlı inkişaf konsepsiyası, ekoloji problemlər və ətraf mühitin mühafizəsi ilə bağlı aktual məsələlərin təcrübi müstəvidə müzakirəsini təşviq etmək olub. Dəyirmi masa formatına uyğun olaraq bütün rollar magistrant və tələbələr tərəfindən icra olunub, rəhbər və akademik heyətin nümayəndələri isə dinləyici və müşahidəçi kimi iştirak ediblər.
Konfrans çərçivəsində üç seksiya fəaliyyət göstərib və hər mərhələ müxtəlif mövzular üzrə tələbə çıxışları ilə yadda qalıb. Birinci mərhələnin moderatoru II kurs magistrantı Nuranə Allahverdiyeva olub. Bu mərhələdə bakalavr tələbələr Aytəkin Əliyeva, Günel Əliyeva, Elmira Qarayeva, Bahar Süleymanova və Süsər Məmmədli “Azərbaycanın palçıq vulkanları – dünya möcüzəsi”, “Topxana meşəsinin qırılması və bərpası”, “Vulkan problemi”, “Dağlıq Qarabağ ərazisində alternativ enerji mənbələri”, “Mühafizə edilən ərazilərdə iqlim dəyişikliyi” və “Təbii fəlakətlərin və meşə yanğınlarının qarşısının alınmasında çətinliklər” mövzularında çıxış ediblər. Təqdimatlarda həm nəzəri, həm də praktik yanaşmalar diqqət mərkəzində olub.
İkinci mərhələ II kurs magistrantı Fatimə Xaspoladovanın moderatorluğu ilə davam edib. Fidan Salmanova, Mircəlal Fəttazadə, Ləman Qəfərzadə, Əsmər Əlizadə və Samra İsmayılovanın çıxışlarında ekoloji və sosial-iqtisadi problemlərin qarşılıqlı əlaqəsi təhlil olunub. “Şoran torpaqlar”, “Ağdam çörək zavodu”, “İqlim dəyişikliklərinin kənd təsərrüfatına təsiri”, “Mühafizə edilən ərazilərdə təsərrüfat fəaliyyəti ilə mühafizə rejimi arasındakı ziddiyyətlər” və “Təmizləyici qurğuların olmaması və ya qeyri-effektiv fəaliyyəti nəticəsində sənaye və məişət tullantılarının sərhəd çaylarının ekoloji vəziyyətinə mənfi təsiri” mövzuları üzrə təqdimatlar edilib.
Üçüncü mərhələ II kurs magistrantı Hüseyn Nağıyevin moderatorluğu ilə keçirilib. Əminə Hədisova, Leyla Dursunova, Türkanə Hüseynli, Ağamalik Aslanov və Sona Vəlizadə tərəfindən təqdim olunan məruzələrdə “Termal və mineral su mənbələri ətrafında formalaşan ticarət obyektlərinin yaratdığı məişət tullantıları”, “Ənənəvi toxum növlərinin məhv olması və bunun aqrar müxtəlifliyə təsiri”, “Sunamilər və onların qlobal nəticələri”, “Kür çayının ekoloji problemləri” və “Mühafizə olunan ərazilərdə həddindən artıq otarılma nəticəsində torpaqların münbitliyinin azalması” kimi mövzular geniş şəkildə işıqlandırılıb.
Tədbirin sonunda ADU-nun Elm və innovasiya məsələləri üzrə prorektoru, professor Həmidə Əliyeva çıxış edərək tələbələrin yüksək səviyyədə hazırladıqları məruzələri və təqdim etdikləri maketləri xüsusi vurğulayıb, onların elmi-tədqiqat fəaliyyətinə marağını yüksək qiymətləndirib. Beynəlxalq Münasibətlər və Regionşünaslıq fakültəsinin dekanı, professor İbrahim Kazımbəyli, Magistratura şöbəsinin müdiri, dosent Namiq Əsədov, Qərb ölkələri üzrə Regionşünaslıq kafedrasının müdiri, professor Sevdagül Əliyeva, dosent Ədalət Abdiyeva, Beynəlxalq münasibətlər kafedrasının müdiri, professor Aidə Yusifzadə, TEC-in sədri Dürrə Həşimova, Strateji inkişaf və planlama şöbəsinin müdiri Röya Əliyeva və THİK-in sədri Zəhra Hüseynova tələbələrin fəallığını və mövzulara yanaşma tərzini yüksək qiymətləndiriblər.
Çıxışlarda qeyd olunub ki, magistrantların moderator kimi fəaliyyəti onların güclü kommunikasiya bacarıqlarını nümayiş etdirir, mövzulara verdikləri şərhlər isə elmi əsaslara söykənərək müzakirələrin keyfiyyətini artırır. Tədbirin sonunda tələbələrə gələcək akademik və peşəkar fəaliyyətlərində uğurlar arzulanıb. Tələbə Elmi Cəmiyyəti (TEC) tərəfindən təqdimat materiallarının elektron formatda toplanaraq sistemləşdiriləcəyi bildirilib.
