Aprelin 23-də Azərbaycan Dillər Universitetinin Xarici dillərin tədrisi metodikası kafedrası və Strateji İnkişaf və Planlama şöbəsinin birgə təşkilatçılığı ilə 2025–2026-cı tədris ili üzrə Dayanıqlı İnkişaf Məqsədləri (DİM) çərçivəsində magistr tələbələr üçün “Tələbə rifahı və psixoloji sağlamlıq” mövzusunda maarifləndirici seminar təşkil olunub. Tədbirin əsas məqsədi tələbələrin psixoloji rifahını gücləndirmək, stressin idarə olunması və emosional dayanıqlığın artırılması istiqamətində praktiki bilik və bacarıqlar qazandırmaq olub.
“Tehsil365” xəbər verir ki, seminarın açılış hissəsində Xarici dillərin tədrisi metodikası kafedrasının müdiri dos. Sevinc Hüseynova, SİP şöbəsinin müdiri baş müəllim Röya Əliyeva və TEC sədri fil.f.d., dos. Dürrə Həşimova çıxış edərək mövzunun aktuallığını vurğulayıblar.
Röya Əliyeva öz çıxışında Dayanıqlı İnkişaf Məqsədlərinin (DİM) əhəmiyyətindən və bu təşəbbüslərin tələbə rifahına töhfəsindən bəhs edib. O, qeyd edib ki, bu istiqamət DİM 3: Sağlam həyat və rifah və DİM 4: Keyfiyyətli təhsil çərçivəsində mühüm əhəmiyyət daşıyır. Bildirib ki, tələbələrin psixoloji sağlamlığı onların akademik uğurunun və ümumi rifahının əsas amillərindən biridir. Bu baxımdan universitetimizdə psixoloji dəstək xidmətlərinin inkişafı və maarifləndirmə tədbirlərinin təşkili prioritet istiqamətlərdən hesab olunur.
Seminara dəvət olunmuş psixoloqlar Hüseynova Bənövşə və Quliyeva Günel tərəfindən Psixoloji sağlamlıq və tələbə rifahının əhəmiyyəti, Emosional dayanıqlıq və özünüifadə bacarıqları, Toksik pozitivlikdən uzaqlaşma, Çətin emosiyaların qəbulu və idarə olunması mövzuları təqdim olunub.
Seminar çərçivəsində tələbələr arasında geniş yayılmış problemlər – stress, imtahan gərginliyi və tükənmişlik sindromu müzakirə edilib, bu problemlərin səbəbləri və risk faktorları təhlil olunub. Seminarda Filologiya fakültəsinin dekan müavini dos. İlahə Əliyeva, Azərbaycan dilçiliyi kafedrasının müdiri dos. Fərəh Niftəliyeva, İngilis dilinin üslubiyyatı kafedrasının müdiri dos. Aytən Hacıyeva və Avropa Dilləri kafedrasının müdiri dos. Şəmsinur Aslanova iştirak edərək müzakirələrə fəal şəkildə qoşulublar.
