Azərbaycanın tibb elmi tarixində elə şəxsiyyətlər var ki, onların fəaliyyəti təkcə elmi kəşflərlə deyil, həm də xalqa olan sonsuz məhəbbətlə ölçülür. 28 aprel – müasir Azərbaycan oftalmologiya məktəbinin banisi, akademik Zərifə xanım Əliyevanın doğum günüdür. O, bir alim kimi zirvələri fəth etməklə yanaşı, həm də Azərbaycanın taleyində silinməz izlər qoyan iki böyük liderin – Heydər Əliyevin vəfalı ömür-gün yoldaşı və İlham Əliyevin mənəvi dünyasını formalaşdıran ana kimi tariximizə düşmüşdür.
“Tehsil365” xəbər verir ki , Zərifə xanım Əliyeva 1923-cü il aprelin 28-də Naxçıvan Muxtar Respublikasının Şərur rayonunun Şahtaxtı kəndində dünyaya göz açmışdır. Görkəmli dövlət xadimi, Azərbaycanın səhiyyə sisteminin qurucularından biri olan Əziz Əliyevin ailəsində böyüyən Zərifə xanım, hələ uşaqlıqdan mərhəmət, intizam və elmə sevgi ruhunda tərbiyə almışdı. Bu mühit onun gələcəkdə insanlara şəfa paylayan bir həkim kimi yetişməsində mühüm rol oynamışdır.
Zərifə Əliyevanın həyat yolu Müasir Azərbaycanın qurucusu, Ümummilli Lider Heydər Əliyev ilə kəsişdikdən sonra bu ittifaq sadəcə bir ailə deyil, mənəvi bir dayaq mərkəzinə çevrildi. Heydər Əliyev kimi nəhəng bir siyasətçinin çiyinlərindəki ağır dövlət yükünü bölüşən, ona ən çətin anlarda mənəvi dəstək olan məhz Zərifə xanım idi. Ulu Öndər hər zaman Zərifə xanımın onun həyatındakı rolunu yüksək qiymətləndirərək demişdir: “Zərifə xanım çox böyük alim olub. Mən hələ onunla həyat quranda o, artıq elm yolunda idi, elmlə məşğul idi. Onun elmi fəaliyyəti məlumdur. O, çox istedadlı, çox xeyirxah, çox sadə insan idi.” Bu iki şəxsiyyətin birliyi Azərbaycan cəmiyyətinə vəfalı olmağın, ailə dəyərlərini qorumağın və vətənpərvərliyin ən mükəmməl nümunəsini təqdim etdi.
Zərifə xanımın ən böyük əsəri, heç şübhəsiz ki, Azərbaycanı bugünkü zəfərlərə daşıyan, xalqın rəhbəri İlham Əliyevdir. Prezident İlham Əliyevin xarakterindəki soyuqqanlılıq, intellektual dərinlik və insani sadəlik məhz Zərifə xanımın verdiyi tərbiyənin bəhrəsidir. Anasının şəfqətini və atasının qətiyyətini özündə birləşdirən cənab Prezident, bu gün Azərbaycanı dünyada qüdrətli dövlətə çevirməklə həm də bu böyük ailənin irsini yaşadır.
Onun elmi fəaliyyəti xüsusilə göz xəstəliklərinin öyrənilməsi, onların profilaktikası və müalicəsi istiqamətində mühüm yeniliklərlə yadda qalmışdır. Zərifə Əliyeva istehsalatla bağlı göz xəstəliklərinin tədqiqi sahəsində dəyərli araşdırmalar aparmış, bu istiqamətdə fundamental əsərlər yazmışdır. Onun elmi irsi bu gün də Azərbaycan tibbində və beynəlxalq oftalmologiya elminin inkişafında mühüm rol oynayır.
Zərifə Əliyeva 1985-ci ildə vəfat etsə də, onun işığı bu gün də gözlərinə şəfa tapmış minlərlə insanın sevincində, onun adını daşıyan Milli Oftalmologiya Mərkəzində və gənc həkimlərin elmi axtarışlarında yaşayır. Hər il 28 aprel tarixində xalqımız Fəxri Xiyabana üz tutur, bu böyük xanımın məzarı önündə ehtiramla baş əyir. Zərifə xanım Əliyeva bizim yaddaşımızda sadəcə bir akademik deyil, Azərbaycan qadınının intellektual gücünü, şəfqətini və zərifliyini özündə birləşdirən əbədi bir rəmzdir.