Bakı Dövlət Universiteti (BDU) və “Qadın Sağlamlığına Dəstək” İctimai Birliyinin təşkilatçılığı, Səhiyyə Nazirliyi və TƏBİB-in tərəfdaşlığı, “Bakı Medical Plaza”nın ev sahibliyi ilə görkəmli oftalmoloq-alim, akademik Zərifə Əliyevanın anadan olmasının 103-cü ildönümünə həsr olunmuş “Qadın sağlamlığının qorunması: multidisiplinar yanaşmalar” mövzusunda respublika elmi-praktiki konfransı keçirilib.
Bu barədə “Tehsil365"ə BDU-dan məlumat verilib.
Konfransı açan BDU-nun Biologiya fakültəsinin dekanı professor Afət Məmmədova akademik Zərifə Əliyevanın Azərbaycan tibb elminin inkişafındakı müstəsna xidmətlərindən, onun yüksək mənəvi keyfiyyətlərindən və oftalmologiya sahəsində qoyduğu zəngin elmi irsdən, həmçinin elmi-praktiki konfransın əhəmiyyətindən bəhs edib. Qeyd olunub ki, Zərifə Əliyevanın elmi fəaliyyəti və insanlara həsr olunmuş ömür yolu bu gün də cəmiyyət üçün örnəkdir.
Konfransın rəsmi hissəsində “Qadın Sağlamlığına Dəstək” İctimai Birliyinin həmsədri, tibb üzrə fəlsəfə doktoru Günay Əhmədova, “Bakı Medical Plaza”nın baş həkim müavini İlkanə Kərəntərli, BDU-nun Biofizika və biokimya kafedrasının müdiri professor Rövşən Xəlilov çıxış ediblər. Çıxışlarda qadın sağlamlığının qorunmasında müasir yanaşmaların tətbiqi, profilaktikanın gücləndirilməsi və müxtəlif ixtisas sahələri üzrə həkimlərin birgə fəaliyyətinin əhəmiyyəti vurğulanıb. Akademik Zərifə Əliyevanın xatirəsinin hər zaman ehtiramla yad edildiyi, onun elmi irsinin və peşəkar dəyərlərinin müasir tibb mütəxəssisləri üçün yol xəritəsi olduğu bildirilib.
Rəsmi hissədən sonra görkəmli alimin həyat və fəaliyyətini əks etdirən videoçarx nümayiş olunub.
Konfrans işini panel müzakirələri ilə davam etdirib. Sessiyalarda qadın sağlamlığının qorunması, erkən diaqnostika, reproduktiv sağlamlıq, müasir müalicə protokolları, hamiləliyin izlənilməsi, ginekoloji xəstəliklərin profilaktikası və multidisiplinar tibbi yanaşmalar kimi mövzularda tanınmış həkim və mütəxəssislər çıxış ediblər. Məruzələrdə sahə üzrə aktual çağırışlar, yeni diaqnostik imkanlar və pasiyentyönümlü tibbi xidmət modeli ətrafında geniş fikir mübadiləsi aparılıb.
Qeyd olunub ki, qadın sağlamlığının qorunması yalnız bir ixtisas çərçivəsində deyil, ginekologiya, endokrinologiya, onkologiya, radiologiya, laborator diaqnostika, psixologiya və biologiya kimi sahələrin birgə yanaşması ilə daha effektiv təmin oluna bilər. Həmçinin maarifləndirmənin artırılması, mütəmadi tibbi müayinələr və erkən müraciətin əhəmiyyəti xüsusi vurğulanıb.