Azərbaycanda PIRLS 2026 tədqiqatı (Oxu Savadlılığının İnkişafı üzrə Beynəlxalq Qiymətləndirmə Tədqiqatı) çərçivəsində monitorinq prosesi davam edir. Elm və Təhsil Nazirliyi tərəfindən təşkil olunan tədqiqatın ilk həftəsində ölkə üzrə ümumilikdə 2539 şagird iştirak edib.
“Tehsil365“ xəbər verir ki, Təhsil İnstitutundan bildirilib ki, statistikaya əsasən, iştirakçı sayına görə ən yüksək göstərici Bakıda qeydə alınıb. Paytaxt üzrə 902 şagird tədqiqata cəlb olunub.
Gəncə-Daşkəsən regionundan 405, Mərkəzi Arandan 337, Şəki-Zaqataladan isə 322, Abşeron-Xızı bölgəsindən 238 şagird tədqiqatda iştirak edib.
Mil-Muğandan 101, Qarabağdan 89, Lənkəran-Astaradan 80 və Şirvan-Salyan regionundan 65 nəfər şagird tədqiqata qatılıb.
Qeyd edək ki, PIRLS tədqiqatı şagirdlərin oxu savadlılığını beynəlxalq səviyyədə qiymətləndirməyə imkan yaradır. Tədqiqatın nəticələri ölkələr üzrə təhsil sistemlərinin effektivliyini müqayisəli şəkildə təhlil etməyə xidmət edir.
Mütəxəssislər hesab edir ki, ilk həftənin nəticələri ümumi iştirak baxımından müsbət dinamikanı əks etdirir və növbəti mərhələlərdə bu göstəricilərin daha da artacağı gözlənilir.