“Bu məsələni sadə şəkildə müəllim, yoxsa ilahiyyatçı kimi qoymaq düzgün yanaşma deyil. Dini dərslərin tədrisi həm pedaqoji peşəkarlıq, həm də dərin dini bilik tələb edir”
Din xadimi Hacı Surxay Məmmədli “Tehsil365”ə açıqlamasında bildirib ki, ən doğru yanaşma bu iki sahənin vəhdətindən keçir:
“İlahiyyatçı elə öz sahəsinin müəllimi olmalıdır. Məktəbdə dərs deyən müəllim ilk növbədə təlim-tərbiyə metodikasını, uşaqlarla işləmə psixologiyasını və didaktikanı yaxşı bilməlidir. Lakin dini mövzular sıradan informasiya deyil. Burada etiqad, əxlaq, fiqh, tarix və mətnlərin düzgün şərhi kimi incə məsələlər var.”
Hacı Surxay Məmmədli vurğulayır ki, bu sahədə ixtisaslaşmış ilahiyyat təhsili və ənənəvi dini bilik xüsusi əhəmiyyət daşıyır:
“Dini bilik yalnız kitabdan oxunmaqla əldə edilmir. O, həm də canlı ənənə, müəllim-şagird silsiləsi və mənəvi məsuliyyət çərçivəsində ötürülür.”
Din xadimi hesab edir ki, dini dərslərin tədrisi ya bu sahədə yetişmiş mütəxəssislər tərəfindən həyata keçirilməli, ya da müəllimlər ciddi ilahiyyat hazırlığından keçməlidirlər:
“Çünki din yalnız məlumat deyil, həm də məsuliyyətdir. Bu məsuliyyəti isə yalnız bilən və onu düzgün şəkildə ötürməyi bacaran insanlar daşımalıdır.”