Aprelin 27-də Azərbaycan Dillər Universitetinin İngilis və fransız dilləri fakültəsinin 319B qrup tələbələri ilə Özbəkistan Dövlət Dünya Dilləri Universitetinin tələbələri arasında “İngilis dilinin tədrisində İKT” fənni üzrə onlayn dərs təşkil olunub.
“Tehsil365” xəbər verir ki, dərs ADU-nun İngilis dilinin tədrisi metodikası kafedrasının müəllimi, filologiya üzrə fəlsəfə doktoru Ellada Mirişova tərəfindən tədris edilib. Dərsdə İngilis dilinin tədrisi metodikası kafedrasının baş müəllimi Təranə Quliyeva və kafedranın magistrantları da iştirak ediblər.
Bu akademik təşəbbüs iki ali təhsil müəssisəsi arasında elmi-pedaqoji əməkdaşlığın gücləndirilməsi və tələbələrin beynəlxalq təhsil mühitinə inteqrasiyasının təşviqi məqsədilə həyata keçirilib.
Tədbirin açılış mərasimində ADU-nun İngilis və fransız dilləri fakültəsinin dekanı, dosent Vəfa Babayeva iştirakçıları salamlayaraq onlara uğurlar arzulayıb. O, təşkil edilən onlayn dərsin tələbələrin bilik və bacarıqlarının genişlənməsində mühüm rol oynadığını və gələcəkdə bu formatda keçiriləcək dərslərin sayının artırılmasının vacibliyini qeyd edib.
Onlayn dərsdə Özbəkistan Dövlət Dünya Dilləri Universitetinin “İngilis” fakültəsinin “Ümumi dilçilik” departamentinin müəllimi Dilshod Khujaev və onun həmkarı Mubina Nəsirova da iştirak ediblər. Onlar bu təşəbbüsün iki universitet arasında akademik əlaqələrin möhkəmləndirilməsi və tələbələrin dil bacarıqlarının inkişafı baxımından əhəmiyyətini vurğulayıblar.
Dərs müddətində tələbələr təqdim edilən mövzu ətrafında fikir mübadiləsi apararaq həm nəzəri biliklərini, həm də praktik İKT bacarıqlarını nümayiş etdirmək imkanı əldə ediblər. Onlayn dərs prosesində yaradılan interaktiv təlim mühiti tələbələrin dil bacarıqlarını daha dərindən mənimsəməsinə və mədəniyyətlərarası dialoqun formalaşmasına şərait yaradıb.
Tədbirin yekununda hər iki ali təhsil müəssisəsinin nümayəndələri bu cür akademik əməkdaşlığın davam etdirilməsinin vacibliyini vurğulayıb, növbəti dərslərin canlı formatda keçirilməsi təklifini irəli sürüblər. Eyni zamanda, gələcəkdə birgə dil layihələrinin və tədris proqramlarının sayının artırılması, tələbələr arasında elmi və mədəni mübadilənin genişləndirilməsi istiqamətində addımların atılmasının zəruriliyi qeyd edilib.