Bu il martın sonu və aprelin əvvəlində Bakıda və Abşeron yarımadasında müşahidə olunan yağıntılar ekstremal xarakter daşıyıb. Yağıntı aylıq normanı bir neçə dəfə üstələyib. Xüsusilə aprelin əvvəllərində yağıntının aylıq normanı təxminən 4 dəfə keçməsi hadisənin intensivliyini bir daha təsdiqləyir.
Bu barədə “Tehsil365” ə Elm və Təhsil Nazirliyi Coğrafiya İnstitutunun Geosiyasət və iqtisadi coğrafiya laboratoriyasının müdiri coğrafiya elmləri doktoru, dosent Nəriman Paşayev məlumat verib. O qeyd edib ki, rayonlar üzrə yağıntının paylanması qeyri-bərabər olub. Ən yüksək intensivlik Bakı şəhərinin şimal-şərq və şimal-qərb zonalarında müşahidə edilib. Xəzər rayonu (Şüvəlan, Buzovna, Mərdəkan) və Binəqədi rayonu (Binəqədi qəsəbəsi, Sulutəpə) yağıntının daha çox cəmləndiyi ərazilər olub. Bu ərazilərdə rütubətli hava kütlələrinin toplanması və dənizin təsiri yağıntının güclənməsinə səbəb olub.
Sabunçu və Suraxanı rayonlarında yağıntı nisbətən zəif olsa da, davamlı xarakter daşıyıb. Bu rayonlarda əsas problem yağıntının intensivliyindən çox, onun uzunmüddətli olması ilə bağlı olub. Mərkəzi rayonlarda (Yasamal, Nəsimi, Nərimanov) isə yağıntı daha bərabər paylansa da, urban səthlərin çoxluğu səbəbindən təsir daha güclü hiss olunub.
Beləliklə, Bakı üzrə yağıntılar martın sonunda ilkin intensiv leysan, aprelin əvvəlində isə daha təhlükəli ikinci pik mərhələ ilə iki əsas dalğada təkrarlanıb.
Mütəxəssisin sözlərinə görə, bu ardıcıl intensiv yağıntılar sonrakı fəsadların formalaşmasında əsas rol oynayıb.