Türk Əməkdaşlıq və Koordinasiya Agentliyinin (TİKA) Bakı proqram koordinasiya ofisində Azərbaycan Milli Elmlər Akademiyasının Mərkəzi Elmi Kitabxanasının (MEK) nümayəndə heyəti ilə görüş keçirilib.
MEK-dən “Tehsil365"ə bildirilib ki, görüşün əsas məqsədi tərəflər arasında mövcud əməkdaşlıq imkanlarının dəyərləndirilməsi və gələcək birgə layihələrin müzakirəsi olub.
Görüşdə TİKA-nın Bakı proqram koordinatorunun müavinləri Kürşat Özdemir və Güven Çolak, əməkdaş Abbas Hümmətov, MEK-in rəqəmsallaşma, innovasiya və elektron xidmətlər üzrə direktor müavini tarix üzrə fəlsəfə doktoru Oruc Quliyev, Süni intellekt və rəqəmsal kitabxana şöbəsinin baş mütəxəssisi riyaziyyat üzrə fəlsəfə doktoru Azad Qurbanov, həmçinin Beynəlxalq əlaqələr şöbəsinin müdiri Mübariz Göyüşlü iştirak ediblər.
Müzakirələr zamanı TİKA-nın Bakı proqram koordinatorluğunun fəaliyyət istiqamətləri, həyata keçirdiyi layihələr və müxtəlif sahələr üzrə təqdim etdiyi dəstək mexanizmləri haqqında danışılıb. Xüsusilə qeyd edilib ki, TİKA Azərbaycan Milli Elmlər Akademiyası və onun tərkibində fəaliyyət göstərən Mərkəzi Elmi Kitabxana ilə birgə layihələrin icrasında maraqlıdır və bu istiqamətdə əməkdaşlığın genişləndirilməsi üçün əlverişli imkanlar mövcuddur.
Daha sonra MEK-in əsas fəaliyyət istiqamətləri, hədəfləri və müasir texniki infrastrukturu barədə məlumat verilib. Kitabxanada son illərdə həyata keçirilən rəqəmsallaşdırma layihələri, innovativ xidmətlər və qardaş Türkiyənin müxtəlif qurumları ilə qurulan səmərəli əməkdaşlıq nümunələri vurğulanıb.
Görüşün sonunda tərəflər qarşılıqlı maraq doğuran sahələr üzrə əməkdaşlığın daha da inkişaf etdirilməsi, birgə layihələrin hazırlanması və konkret istiqamətlər üzrə fəaliyyətin davam etdirilməsi barədə razılığa gəliblər.