Aprelin 28-də Azərbaycan Dövlət Pedaqoji Universitetində (ADPU) Türkiyənin Ordu Universiteti və ADPU-nun birgə təşkilatçılığı ilə “Sosial Tədqiqatların və Fənlərarası Öyrənmənin İnteqrasiyası” III Beynəlxalq Konqresi işə başlayıb. Konqres sosial elmlər sahəsində beynəlxalq elmi əməkdaşlığın genişləndirilməsi, fənlərarası yanaşmaların təşviqi və müasir çağırışların müzakirəsi baxımından mühüm platforma rolunu oynayır.
Bu barədə “Tehsil365"ə ADPU-dan məlumat verilib.
Konqresin Təşkilat Komitəsinin sədri professor Süleyman Erkam Sulak bu cür beynəlxalq elmi platformaların tədqiqatçılar arasında əməkdaşlığın gücləndirilməsi və yeni elmi ideyaların formalaşması baxımından əhəmiyyətini vurğulayıb.
Azərbaycan Dövlət Pedaqoji Universitetinin (ADPU) rektoru professor Cəfər Cəfərov çıxışında müasir dövrdə ali təhsil sisteminin qlobal rəqabət, texnoloji inkişaf və sosial-iqtisadi transformasiyalar fonunda yeni mərhələyə qədəm qoyduğunu bildirib. Rektor qeyd edib ki, rəqəmsallaşma, süni intellekt və innovativ yanaşmalar təhsilin məzmununa və idarəetmə modellərinə ciddi təsir göstərir. C.Cəfərov ali təhsil müəssisələrində strateji idarəetmənin əhəmiyyətinə toxunaraq, universitetlərin uzunmüddətli məqsədlərinin müəyyənləşdirilməsi, resursların səmərəli idarə olunması və dəyişən mühitə çevik uyğunlaşmanın vacibliyini vurğulayıb.
Ordu Universitetinin rektoru professor Orhan Baş Azərbaycan və Türkiyə universitetləri arasında əməkdaşlığın dinamik inkişaf etdiyini vurğulayaraq, bu cür tədbirlərin elmi və akademik əlaqələrin daha da möhkəmlənməsinə xidmət etdiyini bildirib.
Konqres çərçivəsində “Ali təhsildə strateji idarəetmə: reallıqlar və çağırışlar”, “Öyrənmənin yeni memarları: müəllimlər, tələbələr, ailələr və süni intellekt”, “Sosial elmlərin faydaları: bir gələcək perspektivi” mövzularında məruzələr dinlənilib.
Plenar sessiyalardan sonra panel müzakirələr təşkil olunub, iştirakçılar arasında geniş fikir mübadiləsi aparılıb. Daha sonra bölmələrdə araşdırmaların təqdim olunmasına başlanılıb.
Qeyd edək ki, konqresdə ümumilikdə 600-ə qədər müəllif iştirak edir. Proqram çərçivəsində 114 ənənəvi və 189 onlayn olmaqla, ümumilikdə 303 elmi məruzənin təqdim olunması nəzərdə tutulur. Məruzələr 21 ənənəvi və 28 onlayn bölmə olmaqla ümumilikdə 49 bölmədə müzakirə edilir.
Üç gün ərzində keçiriləcək konqresdə sosial elmlərin müxtəlif istiqamətlərini əhatə edən mövzular üzrə müzakirələr aparılacaq, yeni elmi yanaşmalar və tədqiqat nəticələri təqdim olunacaq.