Azərbaycan kinosunun tanınmış simalarından biri olan Əjdər Mütəllim oğlu İbrahimov 29 aprel 1919-cu ildə Aşqabadda anadan olub.
“Tehsil365” xəbər verir ki, O, rejissor, ssenarist, aktyor və pedaqoq kimi çoxşaxəli fəaliyyəti ilə həm Azərbaycan, həm də ümumilikdə sovet kinematoqrafiyasına mühüm töhfələr verib.
Yaradıcılığı boyunca bir sıra yaddaqalan filmlərə imza atan Əjdər İbrahimov milli kino məktəbinin formalaşmasında xüsusi rol oynayıb. Onun ekran əsərləri peşəkar yanaşması, mövzu seçimi və bədii həlli ilə seçilərək tamaşaçıların rəğbətini qazanıb.
Sənətkarın xidmətləri yüksək qiymətləndirilib. O, 1967-ci ildə “Azərbaycan SSR xalq artisti”, 1991-ci ildə isə “SSRİ xalq artisti” fəxri adlarına layiq görülüb. Eyni zamanda Azərbaycan SSR və Türkmənistan SSR-in əməkdar incəsənət xadimi adlarını da daşıyıb.
Əjdər İbrahimov 20 sentyabr 1993-cü ildə Moskvada vəfat edib. Onun zəngin yaradıcılığı və pedaqoji fəaliyyəti bu gün də Azərbaycan kino sənətinin inkişafında mühüm irs kimi dəyərləndirilir.