Aprelin 27-də Azərbaycan Dillər Universitetinin (ADU) İngilis və alman dilləri fakültəsi nəzdində İngilis dilinin leksikologiya kafedrasının baş müəllimi Kəmalə Dünyamalıyevanın rəhbərliyi və Tələbə Elmi Cəmiyyətinin birgə təşkilatçılığı ilə Dayanıqlı İnkişaf Məqsədləri üzrə fəaliyyət planı çərçivəsində Gender bərabərliyi mövzusunda “Cəmiyyətin Dayanıqlığında Gender Balansı” adlı dəyirmi masa keçirilib.
“Tehsil365” xəbər verir ki, tədbirdə İngilis və alman dilləri fakültəsinin dekanı fil.f.d., dos. Naibə Camalzadə, İngilis və fransız dilləri fakültəsinin dekanı fil.f.d., dos. Vəfa Babayeva, İngilis dilinin leksikologiyası kafedrasının müdiri fil.f.d., dos. Mehriban Hüseynova, Tələbə Elmi Cəmiyyətinin sədri fil.f.d., b/m. Dürrə Həşimova, Təlim və metodologiya mərkəzinin müdiri b/m. Mülayim Bağırova və kafedra əməkdaşları iştirak ediblər.
Tədbirdə Sabah qruplarının tələbələri S25A və S25B aktiv iştirak edərək mövzu ətrafında maraqlı təqdimatlar ediblər. Çıxışlar zamanı gender balansının cəmiyyətin inkişafında oynadığı rol geniş şəkildə müzakirə olunub. Tələbələrin fəallığı və maraqlı yanaşmaları sevindirici hal olub. Bu cür tədbirlər gənclərin düşüncə tərzinin formalaşmasına və sosial məsuliyyət hissinin artmasına töhfə verir. Gələcəkdə də bu kimi maarifləndirici tədbirləri davam etdirmək planlaşdırılır.
Tələbələr tərəfindən Birləşmiş Krallıq, Kanada, Argentina, Polşa, Pakistan və digər ölkələrin vətəndaşlardan müsahibə şəklində videoçarx nümayiş olunub.
Sonda fakültə dekanları və tədbir iştirakçıları dəyirmi masa ətrafında mövzu ilə bağlı çıxışlar edib, müzakirələr aparıblar.
