Aprelin 27-də Azərbaycan Dillər Universitetində Psixologiya və Pedaqogika kafedrasının təşkilatçılığı ilə psixoterapiya mövzusunda təlim keçirilib.
“Tehsil365” xəbər verir ki, təlim klinik psixoloqlar Şəbnəm Əşrəfzadə və Mələk Allahverdiyeva tərəfindən aparılıb. Tədbirdə kafedra müdiri dos. İ. M. Məmmədli, kafedranın müəllimi S. E. Bəylərova, Təhsil fakültəsinin dekan müavini p.f.d. S. V. Rüstəmova, eləcə də “Təhsildə sosial-psixoloji xidmət” və “Korreksiyaedici təlim” ixtisaslarının tələbələri iştirak ediblər.
Görüş interaktiv formatda təşkil olunub və tələbələr prosesə aktiv şəkildə qoşularaq müzakirələrdə iştirak ediblər. Təlim zamanı “Sxem Terapiya” mövzusu müzakirə edilib.
Qeyd olunub ki, sxem terapiya insanın həyatında təkrarlanan seçimləri, eyni tip insanlara yönəlməni və oxşar hadisələrin təkrarlanmasını anlamağa kömək edir. Bu yanaşmaya görə, həmin döngülər təsadüfi deyil, daha çox keçmişdən formalaşan daxili qəliblərin təsiri ilə bağlıdır. İnsan şüuraltındakı bu mexanizmləri şüur səviyyəsinə çıxarmadıqca, yaşantılarını çox zaman “taleyim belədir” kimi qəbul edir. Lakin fərqindəlik yarandıqda, insan eyni həyat ssenarisini təkrarlamaq məcburiyyətində olmadığını dərk edir və seçimlərini dəyişə bilir.
