Azərbaycan Dillər Universiteti (ADU) nəzdində fəaliyyət göstərən Türk Dünyası Araşdırmaları Mərkəzinin müdiri Cəlal İbrahimli və Mərkəzin əməkdaşı Türkan Cəfərova Türkmənistanın Azərbaycandakı Səfirliyini ziyarət ediblər.
“Tehsil365” xəbər verir ki, ziyarət çərçivəsində səfir Gurbanmammet Elyasov və səfirliyin üçüncü katibi Shirin Batyrova ilə görüş keçirilib.
Görüş zamanı Azərbaycan ilə Türkmənistan arasında tarixi köklərə söykənən dostluq və qardaşlıq münasibətlərinin möhkəmləndirilməsi, iki ölkə arasında mədəni və elmi əlaqələrin daha da inkişaf etdirilməsi məsələləri ətrafında fikir mübadiləsi aparılıb. Xüsusilə vurğulanıb ki, Türkmənistan Türk dünyasının mühüm mədəni mərkəzlərindən biri kimi zəngin ədəbi irsə, qədim dil qatlarına və özünəməxsus folklor ənənələrinə malikdir. Bu baxımdan, Türkmənistanın mədəni irsinin Türk dünyası kontekstində daha geniş şəkildə tanıdılması və tədqiqi xüsusi əhəmiyyət daşıyır.
Tərəflər dil, ədəbiyyat, tarix və mədəniyyət sahələrində əməkdaşlığın genişləndirilməsinin vacibliyini qeyd edib, bu istiqamətdə ortaq layihələrin həyata keçirilməsinin, eləcə də elmi və mədəni platformaların yaradılmasının zəruriliyini vurğulayıblar.
Görüş zamanı Türk Dünyası Araşdırmaları Mərkəzinin müdiri Cəlal İbrahimli Mərkəzin fəaliyyəti, həyata keçirdiyi layihələr və gördüyü işlər haqqında məlumat verib. O, xüsusilə Mərkəz tərəfindən hazırlanan elmi və mədəni layihələrin Türk dünyası ölkələri arasında ortaq mədəni yaddaşın gücləndirilməsi, dil və ədəbiyyat sahəsində əməkdaşlığın inkişafı və Türk xalqları arasında elmi əlaqələrin genişləndirilməsi baxımından əhəmiyyətini qeyd edib.
Bu çərçivədə “Kaşğarlı Mahmud Yolu və Türk Dünyası” layihəsi çərçivəsində türk dillərinin leksik zənginliyinin araşdırılması və ortaq söz xəzinəsinin üzə çıxarılması, “Türk Dünyası Əl Kitabı” layihəsi vasitəsilə türk xalqlarının tarixi və mədəni irsinin sistemli şəkildə təqdim edilməsi, “Heydər Əliyev və Türk Dünyası” layihəsi ilə Türk dünyasında birlik ideyasının təbliği, eləcə də “Türk Dünyası Dil, Film və Tərcümə” istiqaməti çərçivəsində dil və mədəniyyətlərarası əlaqələrin inkişafı xüsusi olaraq diqqətə çatdırılıb.
Səfirlik nümayəndələri təqdim olunan layihələri yüksək qiymətləndirib, xüsusilə Türkmənistanın dil və ədəbiyyat nümunələrinin bu layihələr çərçivəsində daha geniş şəkildə təbliğinin vacibliyini qeyd ediblər. Eyni zamanda tərəflər gələcəkdə birgə elmi konfransların, seminarların, mədəni tədbirlərin, film nümayişlərinin və tərcümə layihələrinin həyata keçirilməsi, həmçinin qarşılıqlı səfərlərin təşkili istiqamətində əməkdaşlıq imkanlarını müzakirə edib və bu sahədə ilkin razılığa gəliblər.
