Albaniyanın ölkəmizdəki səfiri Besart Kadia Bakı Dövlət Universitetində (BDU) olub.
Universitetdən “Tehsil365"ə bildirilib ki, görüşdə səfirə BDU-nun tədris və elmi-tədqiqat fəaliyyəti, beynəlxalq reytinqlərdə mövqeyi, son illərdə həyata keçirilən beynəlmiləlləşmə strategiyası barədə məlumat verilib.
BDU-nun rektoru Elçin Babayev Albaniya universitetləri ilə əməkdaşlığın qurulmasının universitetin beynəlxalq əlaqələrinin genişləndirilməsi və elmi potensialının gücləndirilməsi baxımından əhəmiyyət daşıdığını qeyd edib. Həmçinin humanitar, sosial və təbiət elmləri, eləcə də mühəndislik sahələrində birgə layihələrin həyata keçirilməsi üçün geniş perspektivlərin olduğu vurğulanıb.
Səfir Besart Kadia Albaniyanın Azərbaycanla elm və təhsil sahəsində əlaqələrin inkişafına xüsusi önəm verdiyini bildirib. O, BDU ilə Albaniya universitetləri arasında birbaşa əməkdaşlıq mexanizmlərinin formalaşdırılmasının hər iki ölkənin akademik icması və gəncləri üçün yeni imkanlar yaradacağını qeyd edib.
Görüş zamanı tərəflər Azərbaycan və Albaniya ali təhsil müəssisələri arasında əməkdaşlıq perspektivlərini müzakirə ediblər. Xüsusilə tələbə və müəllim mübadiləsi, ikili diplom proqramlarının yaradılması, elmi-tədqiqat layihələrinin həyata keçirilməsi və beynəlxalq akademik tədbirlərdə birgə iştirak imkanları diqqət mərkəzində olub. Tərəflər yaxın gələcəkdə konkret əməkdaşlıq istiqamətlərinin müəyyənləşdirilməsi və akademik proqramların hazırlanması məqsədilə işçi əlaqələrinin qurulması barədə razılığa gəliblər.