İstanbulda Birinci Bakı Türkoloji Qurultayının 100 illiyinə həsr olunmuş simpozium keçirilib.
“Tehsil365" xəbər verir ki, tədbir KİAMP - “Qarabağ Azərbaycandır” Koordinasiya Dərnəyi və Dünya Gənc Türk Yazıçılar Birliyinin (DGTYB) təşkilatçılığı, Türk Ədəbiyyatı Vəqfinin (TEDEV) ev sahibliyi ilə baş tutub.
Proqramın rəsmi hissəsində çıxış edən KİAMP-nin Türkiyə üzrə baş koordinatoru Elvin Abdurahmanlı bu qurultayın Türk dünyasının inteqrasiyasındakı kritik roluna toxunaraq deyib: "1926-cı ildə Bakıda təməli qoyulan ortaq məfkurə, bu gün bizim yolumuzu işıqlandırmağa davam edir. Bu simpozium keçmişin mirasını gələcəyin baxışı ilə birləşdirmə qətiyyətimizin təzahürüdür. Dərnəyimiz daxilində qurduğumuz strateji mərkəz və akademik şuralarımızla Türk dünyasının elmi dərinliyini qlobal miqyasda təmsil etməkdə qərarlıyıq”.
Mərasimdə çıxış edən İstanbul valisinin köməkçisi Hasan Hüseyin Can, TÜRKSOY-un İstanbul üzrə təmsilçisi Yerjan Uasis, TEDEV-in sədri Serhat Kabaklı, DGTYB-nin başçısı İntiqam Yaşar və digərləri Türk dünyasının gənc qələm sahiblərinin bu mirasa sahib çıxacağına əminliklərini ifadə edərək, Türkiyə ilə Azərbaycan arasındakı sarsılmaz qardaşlıq münasibətləri və bir əsr əvvəl keçirilən qurultayın ortaq tariximizə verdiyi töhfələrdən bəhs ediblər.
KAİMP-nin Türkiyə üzrə baş koordinatorunun müavini Caner Karakuşun moderatorluğu ilə keçirilən simpoziumda tədqiqatçı-yazıçı Orhan Aras, Bakı Dövlət Universitetinin doktorantı Məleykə Mirzəli və Mərmərə Universitetinin magistrantı Miray Erentürkün türkologiya mövzusunda məruzələri dinlənilib.
Sonra iştirakçıların sualları cavablandırılıb, tədbirə akademik töhfə verən şəxslərə sertifikatlar təqdim edilib.