İndoneziyada yetkinlik yaşına çatmayanların sosial şəbəkələrdən istifadəsi ilə bağlı ciddi məhdudiyyətlər tətbiq edilib. Yeni qərara əsasən, 16 yaşından kiçik uşaqların sosial media platformalarında fəaliyyəti nəzarət altına alınır.
“Tehsil365”in “Antara News”a istinadən verdiyi məlumata görə, məşhur sosial platformalardan biri olan TikTok tərəfindən yetkinlik yaşına çatmayan istifadəçilərə məxsus 1,7 milyon profil deaktiv edilib. Aprelin 10-na qədər təxminən 780 min hesab bağlansa da, sonradan bu proses daha da sürətlənib.
Məlumata görə, ölkədə mart ayının sonunda qüvvəyə minən qanun 16 yaşdan kiçik uşaqların sosial şəbəkələrdən istifadəsini məhdudlaşdırmağı nəzərdə tutur. Qanun çərçivəsində platformalardan istifadə edənlərin yaşının yoxlanılması, uyğun olmayan məzmunun silinməsi və qaydalara əməl olunmadığı təqdirdə platformaların bloklanması kimi tədbirlər nəzərdə tutulur.
İndoneziyanın rabitə və rəqəmsal texnologiyalar naziri Meutya Hafid bildirib ki, bu addımların əsas məqsədi gələcək nəsillərin rəqəmsal mühitdə təhlükəsizliyini təmin etməkdir və cəmiyyətin bu təşəbbüsü dəstəkləyəcəyinə ümid edir.
Mütəxəssislər hesab edir ki, bu kimi qərarlar şagirdlərin sosial mediadan düzgün istifadə vərdişlərinin formalaşdırılması, diqqət dağınıqlığının qarşısının alınması və təhsil prosesinə daha çox fokuslanmalarına müsbət təsir göstərə bilər.