Azərbaycan Dövlət Aqrar Universitetində (ADAU) İqtisadiyyat Nazirliyi yanında Əmlak Məsələləri Dövlət Xidmətinin (ƏMDX) “Karyera görüşləri” adlı tədbiri baş tutub.
ƏMDX-dən “Tehsil365” ə bildirilib ki, tədbirin keçirilməsində məqsəd universitetin tələbə və məzunlarını xidmətdə mövcud olan karyera imkanları, vakansiyalar və təcrübə proqramları haqqında məlumatlandırmaq, onların dövlət sektorunda işə marağını artırmaq olub.
ƏMDX-nin Aparatının İnsan resurslarının idarə edilməsi şöbəsinin müdiri Hüsaməddin Əlizadə tədbir iştirakçılarını xidmətin tarixi, yaranma mərhələləri və əsas fəaliyyət istiqamətləri ilə tanış edib. Xidmətin strukturuna daxil olan qurumlar, həyata keçirdiyi layihələr, müxtəlif ali təhsil müəssisələri ilə qurduğu əməkdaşlıq əlaqələri, tələbə və məzunlara yönəlmiş təcrübə və könüllülük fəaliyyətləri barədə məlumat verilib.
ADAU-nun tədris işləri üzrə prorektoru Əhməd Məlikov tədbir iştirakçılarına universitetin fəaliyyəti, tələbə və məzunlara yönəlmiş xidmətləri, işəgötürənlərlə əməkdaşlıq istiqamətləri barədə məlumat verib.
Tədbir çərçivəsində, ölkədə “Şəhərsalma və Memarlıq İli” elan edilməsi ilə əlaqədar olaraq tələbə və məzunlar üçün nəzərdə tutulan yeni təcrübə proqramları və iştirak imkanları da diqqətə çatdırılıb. Bildirilib ki, “Yer quruluşu, torpaq və şəhər kadastrı”, “Geodeziya mühəndisliyi”, “Torpaqşünaslıq və aqrokimya” kimi ixtisaslar üzrə təhsil alan tələbələr qeyd olunan təcrübə proqramında iştirak edə bilərlər.
Tədbir tələbə və məzunların dövlət qurumlarında karyera qurmaq imkanlarını yaxından tanımalarına və peşəkar inkişaf perspektivləri barədə dolğun təsəvvür əldə etmələrinə şərait yaradıb.