ABŞ-nin Massachusetts Texnologiya İnstitutunun (MIT) yeni araşdırması narahatedici nəticələr ortaya çıxarıb.
“Tehsil365"in xarici mediadan əldə etdiyi məlumata görə, NDMA adlı kimyəvi maddə uşaqlar üçün böyüklərlə müqayisədə daha yüksək xərçəng riski yarada bilər.
NDMA həm çirklənmiş içməli suda, həm bəzi dərmanlarda, həm də emal olunmuş qidalarda rast gəlinə bilən təhlükəli maddədir.
Alimlər siçanlar üzərində apardıqları təcrübədə müəyyən ediblər ki, eyni miqdarda NDMA-ya məruz qalan gənc siçanlarda yaşlılara nisbətən daha çox DNT zədələnməsi və xərçəng halları yaranır.
Mütəxəssislərin fikrincə, bunun əsas səbəbi uşaqların orqanizmində hüceyrələrin daha sürətlə bölünməsidir. Bu da zədələnmiş DNT-nin daha tez xərçəngə səbəb olan mutasiyalara çevrilməsinə yol açır.
Tədqiqatçılar bildirirlər ki, bu nəticələr keçmişdə ABŞ-nin Wilmington bölgəsində çirklənmiş su ilə əlaqələndirilən uşaq xərçəngi halları ilə bağlı müşahidələri də izah edə bilər.