Qarabağ Universitetinin Mühəndislik fakültəsinin müəllimi, fizika üzrə fəlsəfə doktoru Orxan Güləhmədov Elm və Texnologiyada Avropa Əməkdaşlığı proqramı (COST Action CA21126) çərçivəsində elan olunmuş “Qısamüddətli Elmi Missiya” (Short-Term Scientific Mission – STSM) səfər qrantını qazanaraq beynəlxalq elmi-tədqiqat fəaliyyətini davam etdirir.
“Tehsil365“ xəbər verir ki, 12–26 aprel 2026-cı il tarixlərində həyata keçirilən səfər çərçivəsində o, Rumıniya Respublikasının Magurele şəhərində yerləşən Milli Materiallar Fizikası İnstitutunda (National Institute of Materials Physics – NIMP) tədqiqatlar aparır. Tədqiqatlar institutun professoru Mihaela Baibarak ilə birgə “Kosmos tətbiqlərinə uyğun hibrid enerji yığımı və saxlanması üçün triboelektrik nanogeneratorlarda GO və rGO–polisiloksan nanokompozitlərinin spektroskopik tədqiqi” mövzusu üzrə həyata keçirilir.
Aparılan tədqiqatlar çərçivəsində nanokompozit materialların triboelektrik nanogeneratorların çıxış göstəricilərinə təsiri öyrənilir, onların optimallaşdırılması istiqamətində elmi yanaşmalar tətbiq olunur. Bu istiqamətdə əldə olunacaq nəticələrin enerji yığımı sistemlərinin səmərəliliyinin artırılmasına, xüsusilə kosmik və ekstremal mühitlər üçün innovativ enerji həllərinin inkişafına töhfə verəcəyi gözlənilir.
Eyni zamanda, sözügedən elmi əməkdaşlıq Qarabağ Universitetinin Avropanın qabaqcıl elmi-tədqiqat mərkəzləri ilə əlaqələrinin genişləndirilməsi, birgə tədqiqatların və elmi nəşrlərin təşviqi, eləcə də Avropa İttifaqının maliyyələşdirdiyi beynəlxalq proqramlarda, o cümlədən “Horizon Europe” çərçivəsində iştirak imkanlarının artırılması baxımından əhəmiyyətlidir.
Qeyd edək ki, əməkdaşlığın ilkin nəticəsi olaraq “Performance Optimization of Polysiloxane/GO Nanocomposite-Based Triboelectric Nanogenerators with Varying GO Concentrations” adlı elmi məqalə “Fullerenes, Nanotubes and Carbon Nanostructures” jurnalında nəşr üçün qəbul edilmişdir.
Qarabağ Universiteti beynəlxalq elmi əməkdaşlıqların genişləndirilməsi, innovativ tədqiqat mühitinin formalaşdırılması və yüksək ixtisaslı kadr hazırlığının təmin edilməsi istiqamətində fəaliyyətini ardıcıl şəkildə davam etdirir.
