Ötən il Almaniyada cəmi 654,3 min uşaq dünyaya gəlib ki, bu da 1946-cı ildən bəri ən aşağı göstərici hesab olunur.
“Tehsil365” xəbər verir ki, eyni zamanda ölkədə ölüm səviyyəsi yüksək olaraq qalır — 2025-ci ildə 1 milyondan çox insan həyatını itirib. Demoqraflar bu vəziyyəti əsasən 1990-cı illərdə doğulmuş qadınların sayının az olması ilə izah edir — hazırda məhz həmin nəsil doğum yaşına daxil olur.
Bundan əlavə, 2022-ci ildən etibarən bir qadına düşən orta uşaq sayı da azalır. Əgər 4 il əvvəl bu göstərici 1,49 idisə, 2024-cü ildə 1,35-ə qədər enib.
Qeyd olunur ki, Almaniyanın şərq bölgələrində doğum səviyyəsi 4,5%, qərb bölgələrində isə 3,2% azalıb.
Oxşar demoqrafik geriləmə Fransa, Avstriya, İtaliya və İsveç kimi ölkələrdə də müşahidə olunur. Yalnız İspaniya, Niderland və Finlandiya əhalinin sabit artımını nümayiş etdirir.(musavat)