Azərbaycan ədəbiyyatının tanınmış nümayəndələrindən olan Məmməd Səid Ordubadi çoxşaxəli yaradıcılığı ilə milli ədəbi fikrin inkişafında mühüm rol oynayıb.
“Tehsil365” xəbər verir ki, Məmməd Səid Hacı Fəqir oğlu Ordubadi 1872-ci il martın 24-də Ordubadda anadan olub.
Nasir, şair, dramaturq, jurnalist, publisist və tərcüməçi kimi fəaliyyət göstərən Ordubadi Azərbaycan ədəbiyyatında xüsusilə tarixi roman janrının inkişafına böyük töhfələr verib. Onun əsərlərində xalqın azadlıq mübarizəsi, milli-mənəvi dəyərlər və tarixi hadisələr geniş şəkildə əks olunub.
Yazıçının “Qılınc və qələm”, “Dumanlı Təbriz”, “Gizli Bakı” və “Döyüşən şəhər” kimi əsərləri Azərbaycan ədəbiyyatının ən dəyərli nümunələri sırasında yer alır. Bu romanlar uzun illərdir oxucular tərəfindən maraqla qarşılanır.
Məmməd Səid Ordubadinin ədəbiyyat və incəsənət sahəsindəki xidmətləri yüksək qiymətləndirilib və o, 1938-ci ildə “Azərbaycanın Əməkdar incəsənət xadimi” fəxri adına layiq görülüb.
Görkəmli ədib 1950-ci il mayın 1-də Bakıda vəfat edib. Onun zəngin irsi Azərbaycan ədəbiyyatının qızıl fonduna daxil olub.