Bakı Mühəndislik Universitetinin (BMU) SABAH proqramı çərçivəsində təhsil alan qruplarında Multikulturalizmə giriş fənni üzrə ustad dərsi təşkil olunub.
“Tehsil365” xəbər verir ki, “Şəhərsalma və Memarlıq İli” çərçivəsində keçirilən qərs “XIX əsrin sonu - XX əsrin əvvəllərində Bakı multikultural memarlıq nümuməsi kimi" mövzusuna həsr edilib.
Universitetin Ümumi fənlər kafedrasının müdiri dosent Hümeyrə Mustafayevanın keçdiyi dərsdə tələbələrə multikulturalizm anlayışı, Azərbaycanın multikultural modeli haqqında ətraflı məlumat verilib. Bildirilib ki, multikulturalizm memarlıq sahəsində də özünü aydın şəkildə göstərir.
Dərs zamanı Bakının əski memarlıq tarixi, Avropa memarlıq üslublarının Azərbaycanda yayılması və bu prosesə təsir edən amillər diqqətə çatdırılıb. Qeyd olunub ki, neft sənayesinin inkişafı nəticəsində formalaşan zəngin təbəqənin, o cümlədən Hacı Zeynalabdin Tağıyev, Şəmsi Əsədullayev, Murtuza Muxtarov, Musa Nağıyev kimi xeyriyyəçilərin təşəbbüsü ilə şəhərdə müasir memarlıq əsasında müxtəlif binalar inşa edilib. Vurğulanıb ki, Bakı tarixən zəngin və rəngarəng memarlıq nümunələri ilə seçilib. Vaxtilə Avropaya səyahət edən milyonçuların ideyaları və maddi imkanları ilə şəhərdə tikilən binalar bu gün də öz gözəlliyini qoruyub saxlayır. Hazırda paytaxtda müasirliklə klassikanın vəhdəti memarlıq baxımından xüsusi harmoniya yaradır.
İnteraktiv formatda keçən dərsdə tələbələrə müxtəlif memarlıq üslublarında Bakının tarixi binalarının xəyali dizaynını hazırlamaq kimi praktik tapşırıqlar verilib. Maraqla qarşılanan dərs çərçivəsində memarlıq mövzusunda fikir mübadiləsi aparılıb, tələbələrin sualları cavablandırılıb.
