Aprelin 29-da Azərbaycan Dillər Universitetinin BMR fakültəsi nəzdində Qərb ölkələri üzrə Regionşünaslıq kafedrasının müəllimləri “Prezidentin çıxışlarından irəli gələn Azərbaycanın Qərb ölkələri istiqamətində xarici siyasəti” mövzusunda ustad dərsi həyata keçirib. Dərsdə BMR fakültəsi dekanı prof.İ.Kazımbəyli, dekan müavinləri dos. N.Kərimov və dos. A.Abbasov, Qərb ölkələri üzrə Regionşünaslıq kafedrası müdiri prof. S.Əliyeva, kafedranın müəllimləri dos. N.Əsgərova, t.ü.f.d. B.Abdulla, b/m. M. Tajdehibonab, b/m. S.Muradova, m.İmanzadə Əminə, C.Amerikaşünaslıq ixtisası üzrə 382-ci qrup, MŞA ixtisası üzrə 383-cü qrup və Balkanşünaslıq ixtisası üzrə 388-ci qrupun tələbələri iştirak ediblər.
“Tehsil365” xəbər verir ki, Qərb ölkələri üzrə Regionşünaslıq kafedrasının dos. Nigar Əsgərova xarici siyasətin nə olduğu, beynəlxalq münasibətlərin aləti kimi önəmi, xarici siyasətin əsas alətləri, konsepsiyaları, yumşaq və ağıllı güc, prezidentin çıxışlarında beynəlxalq sülh ideyaları haqqında ətraflı məlumat verib. Nigar Əsgərova xarici siyasətin dövlətin öz vətəndaşlarının rifahını və beynəlxalq subyektlər qarşısında maraqlarının təmin olunmasına yönəldiyini və düzgün xarici siyasət konsepsiyasının qurulması üçün sərt, yumşaq və ağıllı gücün balanslı qurulmalı olduğunu qeyd edib.
Qərb ölkələri üzrə Regionşünaslıq kafedrasının baş müəllimi t.ü.f.d. Bəyim Abdulla isə “Azərbaycanın Qərb ölkələri ilə xarici siyasəti: Post müharibə - 2020-ci ildən sonra” mövzusunda çıxış edərək Azərbaycanın 2020-ci ilədək balanslı, uyğunlaşan siyasət yeritdiyini, 2020-ci ildən sonrakı dövrdə isə daha aktiv siyasət yeridən, öz mövqeyini müdafiə edən siyasət həyata keçirdiyini bildirib. Bəyim Abdulla Azərbaycanın beynəlxalq münasibətlərdə orta güc rolu oynadığını və son dövrlər beynəlxalq tədbirlər vasitəsilə yumşaq güc həyata keçirdiyini, beynəlxalq imicimizin formalaşdırıldığını vurğulayıb.
Qərb ölkələri üzrə Regionşünaslıq kafedrasının baş müəllimi Mehparə Tajdehibonab Azərbaycanın MŞA ölkələri ilə əlaqələrinin hələ SSRİ dövründən qurulduğunu qeyd edib və 383-cü qrup tələbələri Əmrahova Şəlalə və Əlizadə Əsmər MŞA ölkələri ilə Azərbaycanın tarixi əlaqələri haqqında məlumat verib. Kafedranın baş müəllimi Səbinə Muradova isə Balkan ölkələri və Azərbaycanın geniş diplomatik, iqtisadi əlaqələri olduğunu vurğulayıb və 388-ci qrup tələbəsi Sultanova Türkanə Balkan ölkələri və xüsusilə Serbiya ilə Azərbaycan arasında imzalanmış müqavilələr, diplomatik əlaqələr haqqında ətraflı məlumat verib. m. İmanzadə Əminə isə Cənubi Amerika ölkələri ilə Azərbaycan arasında diplomatik əlaqələrin qurulması, 2010-cu ildən bu əlaqələrin intensivləşməsi haqqında, 382-ci qrup tələbəsi Hədisova Əminə isə Uruqvay və Azərbaycan arasında diplomatik əlaqələrin gərginləşməsi haqqında ətraflı məlumat verib.
